Avvalroq Toshkent shahri Sergeli tumanida ikki nafar shifokor bemor va uning tanishlari tomonidan ayovsiz kaltaklangani haqida xabar berilgan edi. Bosh prokuratura matbuot kotibi Hayot Shamsutdinov holat yuzasidan jinoyat ishi qoʻzgʻatilganini maʼlum qildi.

Bildirilishicha, Toshkentdagi 1-son shahar klinik shifoxonasida ikki nafar shifokorga tan jarohati yetkazgan shaxslarga nisbatan Jinoyat kodeksining 277-moddasi (Bezorilik) bilan jinoyat ishi qoʻzgʻatilgan. Gumonlanuvchilar protsessual tartibda ushlangan.

Qoʻshimcha qilinishicha, hozirda ichki ishlar organlari tomonidan tergov harakatlari olib borilmoqda.

Voqea tafsilotlari quyidagicha boʻlgandi:

27-iyul kuni soat taxminan 07:20 larda poytaxtdagi 1-son shahar klinik shifoxonasi qabul boʻlimiga Sergeli tumani, Xonobod 4-tor koʻchasida yashovchi 1997-yilda tugʻilgan fuqaro B.I. ikki nafar oʻrtogʻi ' 1997-yilda tugʻilgan P.I. va S.B.lar hamrohligida olib kelingan. Shundan soʻng, bemor B.I. zudlik bilan navbatchi travmatolog-shifokor A.A. tomonidan tibbiy koʻrikdan oʻtkazilgan.

Unga dastlabki tekshiruv davomida unga 'Ikkala qoʻl-bilak sohalari, koʻkrak qafasi va qorin oldi devorining koʻplab kesilgan jarohatlari. Gemorragik shok 2-3-daraja' tashxisi qoʻyilgan. Shuningdek, bemorning holati ogʻir, shok holatida deya baholanib, zudlik bilan qon toʻxtatish va shokka qarshi birinchi tibbiy yordam koʻrsatilgan hamda qoʻshma shikastlanishlar shoshilinch boʻlimining mikroxirurgiya oʻrniga gospitalizatsiya qilingan.

Soat 07:40 da tanadagi koʻplab kesilgan jarohatlar inobatga olinib, u darhol xirurgik amaliyot oʻtkazish maqsadida mikroxirurgiya operatsiya xonasiga olib kirilgan. Xirurgik amaliyotga tayyorlash vaqtida bemor shifokor-mikroxirurg M.X.ga jiddiy qarshilik koʻrsata boshlagan va tibbiyot xodimiga tarsaki tushirib, uni haqorat qilgan. Bu ham yetmagandek, u operatsion stoldan tushib, shifokorni qattiq doʻpposlay boshlagan.

Soʻng, shifokor M.X. 'mushtumzoʻr' bemorning oʻrtoqlari ' P.I. va S.B. tomonidan ham kaltaklagan. Shu vaqtda shoshilinch xirurgiya boʻlimining navbatchi shifokori H.U. bemorga xirurgik amaliyotni bajarish uchun operatsion blokka kelgan.

P.I. va S.B. bu tibbiyot xodimini ham ayovsiz doʻpposlab, unga jiddiy tan jarohati yetkazgan. Oqibatda shifokor hushidan ketib, karaxtlik-koma holatiga tushgan va zudlik bilan reanimatsiya boʻlimiga yotqizilgan.