Qayd etilishicha, bu inshoot qadimgi podshohlik davrida 3-sulolaning birinchi yoki ikkinchi firʼavni (miloddan avvalgi 2670-2650) Joser uchun qurilgan. U Sakkara platosida joylashgan boʻlib, oltita katta zinapoyadan iborat va balandligi 60 metrga teng.

Bugungi kunga qadar piramidalarning qurilishi haqida hech qanday manba saqlanib qolmagan. Shuning uchun olimlar qanday texnologiyalar ishlatilganligini bilishmaydi. Eng keng tarqalgan nazariyaga koʻra, ogʻir tosh bloklar panduslar yordamida balandlikka koʻtarilgan.

Yangi tadqiqotlar shuni koʻrsatdiki, Joser piramidasi gidravlik lift yordamida qurilgan boʻlishi mumkin. Olimlar Sakkara gidrologik kuzatuvlar tarmogʻini har tomonlama tahlil qilishdi. Ular piramida Gisr al-Mudir toʻgʻoni gʻarbidagi suv havzasida joylashganligini aniqladilar.

Shunday qilib, qurilish hududida koʻl (hozirda mavjud emas) boʻlishi taxmin qilinmoqda. Uning suvi piramidani oʻrab turgan xandaqni toʻldirgan, bu esa navigatsiya va materiallarni tashishni osonlashtirgan.

Olimlar, shuningdek, Sakkarada 'juda ilgʻor' suvni boshqarish tizimini topdi. U Gisr al-Mudir toʻgʻoni va kanal bilan bogʻlangan bir qator tosh boʻlimlardan suv tozalash tizimini oʻz ichiga oladi.

Tadqiqotchilar misrliklar Joser piramidasini qurish uchun gidravlik liftdan foydalangan boʻlishi mumkin degan xulosaga kelishdi. Buning asosiy sababi esa piramidada vertikal mil mavjud. Bu boshqa hech qanday maʼlum piramidada uchramaydi. Shu bois qadimgi meʼmorlar suv bosimi yordamida toshlarni koʻtargan, deyilmoqda.

Simulyatsiyalar bir vaqtning oʻzida 50 dan 100 tonnagacha toshni koʻtarish mumkinligini koʻrsatdi.