Toshkent viloyatida 17 yoshli narkotik kureri ushlandi. Bu haqda viloyat ichki ishlar bosh boshqarmasi xabar berdi.

Qayd etilishicha, Toshkent tumanida o‘tkazilgan tezkor tadbirda 2007 yilda tug‘ilgan fuqaro nazoratdagi xaridorga 70 dona “Aminometil” hamda 3 dona “Tropikamid” kuchli ta’sir qiluvchi dori vositalarini 4 mln 300 ming so‘mga sotayotgan vaqtida ushlangan. Uning yonidan yana shu kabi 7 dona kuchli ta’sir qiluvchi dori vositalari daliliy ashyo sifatida olingan.

Surishtiruvlar davomida aniqlanishicha, mazkur dorilarni nazoratdagi xaridorga 1981 yilda tug‘ilgan shaxs yetkazishi kerak bo‘lgan, ammo ota bu ish uchun 17 yoshli farzandini yuborgan.

Tezkor tadbir davom ettirilib, ota-bolaning yashash xonadoni ko‘zdan kechirildi. Natijada 9,8 ming dona “Zardeks”, 250 dona “Aminometil” hamda 15 dona “Tropikamid” (qora bozordagi narxi 857 mln so‘mlik) kuchli ta’sir qiluvchi, psixofaol dori vositalari sotish maqsadida xonadonda saqlanayotganligi aniqlanib, daliliy ashyo sifatida olingan.

Holat yuzasidan ushlangan shaxslarga nisbatan Jinoyat kodeksining 251/1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) 3-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.

Eslatib o‘tamiz, avvalroq Jizzaxda uyida qurol va giyohvand moddalar saqlagan 58 yoshli erkak ushlangandi.