Buxoro viloyatida mahallalarda sodir etilgan og‘ir va o‘ta og‘ir turdagi jinoyatlarni viloyat hokimi boshchiligida sektor rahbarlari tomonidan keng muhokama qilish bo‘yicha “Buxoro tajribasi” yaratildi. Navbatdagi “mahallabay” muhokama G‘ijduvon tumani hokimligi majlislar zalida o‘tkazildi. Videokonferensaloqa tizimi asosida o‘tkazilgan muhokamada viloyat hokimi B.Zaripov, viloyat prokurori U.Hamdamov, Ichki ishlar boshqarmasi boshlig‘i, podpolkovnik I.Tursunov boshchiligida huquq-tartibot organlari mas'ullari, tuman (shahar)larning sektor rahbarlari, huquqbuzarliklar profilaktikasi va jinoyatchilikka qarshi kurashish bo‘yicha viloyat hamda hududiy idoralararo komissiyasiga a'zo tashkilotlar mutasaddilari, 544 ta mahallalar yettilik vakillari ishtirok etishdi.

Tanqidiy tarzda o‘tgan muhokamada G‘ijduvon tumanining “Paxtaobod” hamda Qorovulbozor tumanining “Tinchlik” mahallalarida sodir etilgan o‘ta og‘ir turdagi jinoyatlarning kelib chiqish sabablari, ularga omil bo‘layotgan shart-sharoitlar birma-bir tahlil qilindi. Bu kabi jinoyatlarning oldini olish borasida amalga oshirilishi lozim bo‘lgan profilaktik tadbirlar xususida so‘z yuritildi. “Qizil” toifaga kirgan ushbu ikki mahalla mas'ullarining hududda jinoyat va huquqbuzarliklarning oldini olish, “Obod va xavfsiz mahalla” tamoyili asosida mahallalarda xavfsiz muhitni yaratish mexanizmlarini belgilash doirasida amalga oshirgan ishlari yuzasidan hisobotlari tinglandi. So‘ng mas'ullarning yo‘l qo‘ygan kamchiliklari birma-bir tanqidiy tahlil qilindi.

Jarayonda muhokamaga qo‘yilgan mahallalar mas'ullariga, shuningdek, hududiy sektor rahbarlari va boshqa mutasaddilarga nisbatan intizomiy ta'sir choralarini qo‘llash to‘g‘risida qarorlar qabul qilindi. Muhokama yakunida viloyat hokimi tomonidan barcha darajadagi rahbarlar, mahalla yettilik vakillariga har bir ko‘cha, qishloq, ovul va aholi punktlaridagi har qanday muammoli oilalarni o‘z vaqtida aniqlash, mahallalarda kambag‘allikni qisqartirish, ishsizlikni kamaytirish, migratsiyada yurib qiynalgan fuqarolarni qaytarish va ularni ish bilan ta'minlash, migratsiyada yurgan fuqarolarning oila a'zolari, sudda nizolashayotgan yoki nizoli oila sifatida profilaktik hisobga olingan, ajrim yoqasiga kelib qolgan oilalar, probasiya xizmati nazorati ostida turgan, shuningdek, ruhiy asab hamda narkologiya dispanseri ro‘yxatida turgan, oilaviy zo‘ravonlikka uchragan shaxslar bilan manzilli ishlash borasida hududiy sektor rahbarlari va boshqa mutasaddilar birgalikda manzilli ish olib borishlari yuzasidan topshiriqlarini berdi.

O‘z muxbirimiz.

Buxoro viloyati.