Germaniya kansleri Olaf Shols 2026 yildan boshlab Amerikaning uzoq masofaga uchuvchi qurollarining Germaniyada joylashtirilishini urushning oldini olish deb atadi. Bu haqda kecha, 12 iyul kuni Berlinda Yaponiya Bosh vaziri Fumio Kisida bilan uchrashuvdan so‘ng so‘z ochdi.

“U to‘xtatuvchi ta’sir tufayli xavfsizlikni oshiradi, chunki siz orqa tomondan hujum qila olmaysiz. Biz har doim urushning oldini olishga harakat qilamiz”, deydi kansler.

Bundan tashqari, Shols Germaniya Ukrainaga qurol yetkazib berish Rossiya bilan to‘g‘ridan to‘g‘ri qarama-qarshilikka olib kelmasligi uchun nazoratni davom ettirishini tasdiqladi.

“Bu yerda qabul qilayotgan qarorlarimiz hamisha mamlakatimiz va ittifoq xavfsizligini ta’minlashga qaratilgani ham birdek ravshan”, deydi Shols.

“Reuters”ning yozishicha, Shols bir qator nemis siyosatchilarining yangi Amerika qurollarining joylashtirilishi Germaniyaning Rossiya bilan munosabatlarining keskinlashishini anglatadi, degan tanqidni rad etdi.

“Aksincha, Qo‘shma Shtatlar Germaniyaning ittifoqchisi sifatida yevropaliklar mavjud mudofaa qurollari taqchilligini mustaqil qoplamaguncha mamlakatni qo‘shimcha himoya qiladi”, deya ta’kidladi Shols.

Berlindagi uchrashuvda Shols va Kisida Germaniya va Yaponiya yaqin iqtisodiy muloqot orqali Xitoyga qaramligini kamaytirish choralarini ko‘rishiga kelishib oldi.

“Reuters” xabariga ko‘ra, Yaponiya Bosh vaziri “Xitoyning ortiqcha ishlab chiqarishi”ni boshqa sanoatlashgan mamlakatlar uchun zararli deb atadi.

O‘z navbatida, Germaniya hukumati rahbari adolatli, erkin global savdoga chaqirdi, bu esa teng sharoitlarni talab qiladi. U Berlindagi federal hukumat va uyali aloqa kompaniyalari o‘rtasida 2029 yil oxirigacha Xitoyning Huawei va ZTE kompaniyalari komponentlarini 5G tarmoqlarida ishlatmaslik to‘g‘risidagi kelishuvni himoya qildi.

Fumio Kisida, shuningdek, Xitoyning sanoat siyosatiga qo‘shma javob G‘arbiy sanoatlashgan yettilik guruhi (G7)ning so‘nggi yig‘ilishida allaqachon kelishilganini ta’kidladi.

“Germaniya-Yaponiya hukumatining navbatdagi maslahatlashuvlari 2025 yilda Germaniyada bo‘lib o‘tishi kerak”, deya qayd etadi agentlik.

Biroq Xitoydan import qilinadigan elektr transport vositalariga nisbatan jazo tariflari bo‘yicha bahsda kansler YeI va Xitoy o‘rtasidagi kelishuvga umid qilmoqda.

“Reuters” agentligining xabar berishicha, federal hukumat 15 iyul kuni Bryusselda bo‘lib o‘tadigan Xitoydan elektromobillar uchun vaqtinchalik jazo tariflari bo‘yicha Yevropa Ittifoqining ichki ovoz berishda ishtirok etishdan tiyilishi mumkin. Oy boshida Yevrokomissiya Xitoyning ushbu turdagi elektromobil mahsulotlariga Xitoyni nohaq raqobatda ayblagani sababli vaqtinchalik jazo tariflarini joriy qilgan edi.

Rossiya Tashqi ishlar vazirligi Germaniyada Tomahawk  qanotli raketalari va boshqa uzoq masofaga uchuvchi AQSH qurollarining joylashtirilishini “eskalatsiya yo‘nalishidagi bo‘g‘in” deb hisoblaydi.

Rossiya Tashqi ishlar vaziri o‘rinbosari Sergey Ryabkovning so‘zlariga ko‘ra, Rossiya birinchi navbatda, ushbu yangi o‘yinga harbiy javobni ishlab chiqadi.

10 iyul kuni AQSH Rossiyani tiyib turish uchun NATOdagi Yevropadagi hamkorlarini himoya qilish choralarini kuchaytirishi ma’lum bo‘ldi. Xususan, Tomahawk qanotli raketalari va boshqa uzoq masofaga uchuvchi qurollar 2026 yildan boshlab Germaniyada vaqtincha joylashtiriladi.

Vashingtondagi NATO sammiti arafasida e’lon qilingan AQSH-Germaniya qo‘shma bayonotida SM-6 zenit-raketalari va “Yevropadagi mavjud yerga asoslangan tizimlarga qaraganda ancha uzoqroq masofaga ega” gipertovushli qurollarning yangi turlari haqida ham aytilgan.

Shuning uchun Germaniyada “Sovuq Urush”dan beri birinchi marta Rossiya hududiga yetib bora oladigan qurol tizimlari yana joylashtiriladi.

Tomahawk qanotli raketalari, xuddi Germaniyaning TAURUS raketalari kabi, past balandliklarda dushman hududiga chuqur kirib borish va qo‘mondonlik markazlari, bunkerlar va radarlar kabi muhim nishonlarni yo‘q qilishga qodir.

Shu bilan birga, Tomahawks kemalar va suv osti kemalaridan, TAURUS esa samolyotlardan chiqariladi.