Har bir xalqning o‘z tabiiy sharoiti va istagiga ko‘ra o‘zi sevgan ichimligi hamda yeguligi bo‘lar ekan. Masalan, yaponlar – guruch, qora kunjut, soya o‘simligi mahsulotlarini, inglizlar – konfetni, finlar – qahvani, bolgarlar – shakarni, amerikaliklar – go‘shtni sevib iste'mol qilisharkan. Choyxo‘rlikda esa o‘zbek va irlandlarning oldiga tushadigani yo‘q.

Choy tarkibidagi polifenol rak va boshqa nuqsonlarning oldini oladi. U qon va to‘qimalarda to‘planib, rak hujayralarini yo‘q qiladi. Yaponiyaliklar ko‘k choy odam tanasini radiaktiv moddalardan tozalashini aniqlashgan. U miya faoliyatini yaxshilaydi, qon tomirlari qayishqoqligini oshiradi, qon bosimini pasaytiradi, tanani dahmaza moddalardan forig‘ etishda muhim rol' o‘ynaydi. Agar homilador ayol ko‘k choy ichsa, chaqalog‘i benuqson tug‘iladi. Qisqasi, ko‘k choyning boshqa choylarga nisbatan zarari juda kam. Ammo ko‘k choy ba'zilarda mijozni sustlashtiradi, sillasini quritadi, odam tanasidagi zarur mikroelementlarni yuvib ketadi. 

Qora choyning ham o‘ziga yarasha foydali tomonlari yetarli. Shotlandiyalik olimlar aniqlashicha, qora choy qandli diabetga chalingan bemorlarga ijobiy ta'sir qilar ekan. Xususan, inson organizmida qandli diabet xastaligi rivojlanishiga qarshi immunitet hosil qiladi. Yana uning tarkibidagi polifenol moddasi insulin o‘rnini bosar ekan...  

Xulosa qilib aytadigan bo‘lsak, odam organizmi saralash xususiyatiga ega. U choyni ham tahlillaydi. Bu o‘sha kishi yashayotgan joy va iqlimga bog‘liq. Shu tufayli qora yoki ko‘k choy ichiladi. Muhimi, choy sizni tetiklashtirib, kayfiyatingizni ko‘tarsa bas. Choyga marhamat, azizlarim!

Mirzoqul AHADOV tayyorladi.