Eron Isroilni Livanning “Hizbulloh” harakatiga qarshi keng qamrovli urush olib borish oqibatlari haqida ogohlantirdi. Bu haqda Eronning BMTdagi missiyasi ma’lum qildi.

“Shak-shubhasiz, bu urushda bitta mag‘lub bo‘ladi. Bu sionistik rejimdir. Livanning qarshilik harakati “Hizbulloh” o‘zini va Livanni himoya qilish qobiliyatiga ega. Ehtimol, bu noqonuniy rejimni o‘z-o‘zini yo‘q qilish vaqti keldi”, deya ta’kidladi Eronning BMTdagi missiyasi.

Shuningdek, ushbu bayonotda Isroilning Livanga qarshi har qanday harakati mintaqani yangi mojaroga olib kelishi mumkinligi haqida ogohlantirildi.

“Bosqinchi Isroil rejimining o‘zini qutqarish bo‘yicha har qanday beparvo qarori mintaqani yangi urushga olib kelishi mumkin. Buning oqibatida Livan infratuzilmasi hamda 1948 yilda bosib olingan hududlarning vayron bo‘lishiga olib kelishi mumkin”, deyiladi bayonotda.

Isroil rejimi va “Hizbulloh” Livanning janubiy chegarasida 7 oktyabrda G‘azoga hujum boshlangandan beri deyarli har kuni o‘q almashib kelmoqda. O‘tgan haftada keskinlik, ayniqsa, “Hizbulloh”ning yuqori martabali qo‘mondoni Sami Tolib Abdulloh Isroil tomonidan o‘ldirilishi ortidan kuchaygan. Harakat bunga javoban bosib olingan hududlarning shimoliy qismlariga yuzlab raketalarni otdi. “Hizbulloh”ning aytishicha, uning amaliyotlari G‘azo qarshiliklarini qo‘llab-quvvatlash va hududdagi genotsidni to‘xtatish uchun rejimga bosim o‘tkazishni maqsad qilgan.

18 iyun kuni Isroil armiyasi Livanga hujum qilish rejalarini ma’qullaganini ma’lum qildi. 19 iyun kuni “Hizbulloh” Bosh kotibi Sayyid Hasan Nasrulloh, agar keng ko‘lamdagi urush boshlansa, Isroil tomonidan bosib olingan hududlarda hech bir joy raketalardan omon qolmasligiga va’da berdi.

Birlashgan Millatlar Tashkiloti Bosh kotibi Livan keskinlik kuchayib borayotgan bir paytda mamlakatni “ikkinchi G‘azo”ga aylantirib yuborishi mumkinligidan xavotirda. Antoniu Guterrish Isroil rasmiylari Livanga bostirib kirish bilan tahdid qilganidan keyin G‘arbiy Osiyoda kengroq mojarodan ogohlantirdi.

Eslatib o‘tamiz, 12 iyun kuni Isroilning Livan janubidagi Jouya qishlog‘iga uyushtirgan hujumi oqibatida kamida to‘rt kishi halok bo‘lgandi. Ular orasida “Hizbulloh” guruhining yuqori darajali dala qo‘mondoni ham bor edi.