Shveysariyaning Byurgenshtok shahrida bo‘lib o‘tgan forumga o‘xshash Ukraina bo‘yicha navbatdagi konferensiya, katta ehtimol bilan, Yevropa davlatlarida o‘tkazilmaydi. Bu haqda Shveysariya Tashqi ishlar federal departamenti xalqaro xavfsizlik departamenti rahbari Gabriel Lyuxinger ma’lum qildi. 

“Bu (konferensiya), albatta, Yevropada yoki G‘arbda o‘tkazilmaydi. Biz Byurgenshtokda manfaatdor davlatlar bilan muzokaralar olib bordik”, deydi u SRF teleradiokompaniyasiga bergan intervyusida. 

Lyuxinger tadbir tashkilotchisi bo‘lishi mumkin bo‘lgan davlatlar “tez orada harakat qiladi” degan fikrni bildirgan.  

Shveysariya TIV vakilining ta’kidlashicha, navbatdagi konferensiyada Rossiya qandaydir tarzda ishga qo‘shilishi kerak. Uning so‘zlariga ko‘ra, Xitoysiz mojaroni hal qilishning ham imkoni yo‘q. 

“Byurgenshtokda [Xitoyni konferensiyaga] jalb qilishning iloji yo‘qligidan xafa bo‘ldim”, deydi u. 

Lyuxinger Shveysariya Xitoy vakillari bilan aloqada ekanligini va Rossiya bilan munosabatlarni saqlab turishini qo‘shimcha qilgan. 

Ukraina bo‘yicha konferensiya Ukraina tomonining tashabbusi bilan 15-16 iyun kunlari Byurgenshtokda bo‘lib o‘tdi. 14 iyun kuni e’lon qilingan ishtirokchilarning rasmiy ro‘yxatiga 91 davlat, Serbiyaning Kosovo mintaqasi va 8 xalqaro tashkilot kiritilgan. Forumning yakuniy kommyunikesini 15 davlat: Armaniston, Bahrayn, Braziliya, Vatikan, Hindiston, Indoneziya, Iordaniya, Iroq, Kolumbiya, Liviya, Meksika, Birlashgan Arab Amirliklari, Saudiya Arabistoni, Tailand va JAR imzolamadi. Rossiya Byurgenshtokga taklif qilinmadi. BMT a’zolarining aksariyat delegatsiyalari, xususan Ozarbayjon, Belarus, Venesuela, Misr, Eron, Qozog‘iston, Qirg‘iziston, Xitoy, Kuba, Pokiston, Tojikiston, Turkmaniston, O‘zbekiston va Efiopiya qatnashmagan.