15 may kuni suiqasdga uchragan Slovakiya Bosh vaziri Robert Fitso hujumchiga nisbatan nafrat his qilmaganini aytdi. Bosh vazir iyun-iyul oylarida ishga qaytish niyatida va hozirda Bratislavadagi Avliyo Mixail shifoxonasida ambulator davolanmoqda. Bu uning suiqasddan keyin birinchi marta omma oldida chiqishi.

"Men uchun birinchi qadamni qo‘yish vaqti keldi. Bu kechirim. Meni otgan odamdan nafratlanmayman. Men unga nisbatan hech qanday qonuniy choralar ko‘rmayman va yetkazilgan zararni qoplashni talab qilmoqchi emasman. Men uni kechiraman", deydi Robert Fitso o‘zining Facebook'dagi sahifasida e’lon qilgan videomurojaatida.

Bosh vazirning ta’kidlashicha, u hujumchiga o‘z harakati sabablarini aniqlashga imkon beradi.

“Oxir-oqibat, u shunchaki siyosiy mag‘lublar, hafsalasi pir bo‘lgan muxolifat Slovakiyada yengib bo‘lmas darajada rivojlantirgan yovuzlik va siyosiy nafratning elchisi bo‘lganligi aniq. Bu yolg‘iz telbaning hujumi deb o‘ylash uchun hech qanday asos yo‘q”, degan Bosh vazir.

15 may kuni Gandlova shahrida Bosh vazir Robert Fitso 71 yoshli yozuvchi Juray Cintula tomonidan bir necha marta otilgandi. U o‘z sabablarini Slovakiya hukumati faoliyatiga rozi emasligi bilan izohladi.

“Republika” nashriga ko‘ra, Juray Cintula muxolifatdagi “Progressiv Slovakiya” liberal partiyasi tarafdori. Biroq, muxolifat partiyasi rahbari Mixal Shimeska Cintula va harakat o‘rtasidagi aloqani rad etdi.