– Joriy yil boshidan buyon 45000 dan ortiq transport vositalarini ro‘yxatlash, qay­ta ro‘yxatlash hamda qayta jihozlash bo‘yicha xizmat ko‘rsatildi, – deydi bo‘linma boshlig‘i, leytenant Sardor Sidiqov. – Bo‘linmada xizmat ko‘rsatish maxsus moslamalar yordamida avtomatlashtirilgan tizim orqali amalga oshiriladi. Xususan, davlat raqam belgilari avtomatik ravishda navbat bilan beriladi. Ma’lumotlar planshet moslamasiga kiritilib, elektron tarzda shakllantiriladi. Shuningdek, nogironligi bor, imkoniyati cheklangan murojaatchilar navbatsiz qabul qilinishi yo‘lga qo‘yilgan. 

O‘z ishiga mas’uliyat bilan yondashib, har bir hujjatni sinchiklab o‘rganayotgan, avtomashinalar texnik ko‘rigiga jiddiy e’tibor bergan holda, xizmat olib borayotgan xodimlarimizdan katta inspektor, katta serjant Sarvar O‘roqov, inspektorlar – serjantlar Sharifjon Xayrullayev, Oybek Ahmadov hamda kichik serjant Nodir Tillayev nomlarini alohida qayd etib o‘tish joiz.

Bo‘linmaga avtomashina hujjatlari hamda davlat raqam belgilarining tushib qolishi yoki yaroqsiz holga kelib qolishi yuzasidan ham murojaatlar bo‘lib turadi. Shunday paytlarda fuqarolarga ehtiyot bo‘lishlari, loqaydlik va e’tiborsizlik salbiy oqibatlarga olib kelishi yuzasidan tushuntirish ishlari olib boriladi. Shuningdek, YPX inspektorlari tomonidan poytaxtimizdagi YPX maskanlarida va boshqa joylarda transport vositasilarining davlat raqamlari qoidalarda ko‘rsatilganidek qotirilmagan bo‘lsa, maxsus moslamalar yordamida qotirish ishlari ham olib boriladiki, bu turli noxush holatlarning oldini olishda muhim ahamiyat kasb etadi.

Shuningdek, yo‘l harakati qoidalariga ko‘ra, davlat ro‘yxatlash raqam belgilari ko‘rinmaydigan, qalbakilash­tirilgan, o‘zgartirilgan bo‘lsa, transport vositalaridan foydalanish taqiqlanishi belgilab qo‘yilgan. Qonunchilikka binoan, davlat raqam belgilarini ko‘rish imkoniyatini cheklaydigan, ularni ang­lashga to‘sqinlik qiladigan turli ashyolar o‘rnatish va qoplama surtish holatlari aniqlansa, bu qurilmalar musodara qilinib, fuqarolarga jarima qo‘llashga sabab bo‘ladi.

Shunday ekan, transport vositangiz, uning hujjatlari va jihozlariga jiddiy e’tibor qaratib, ularni ehtiyot qiling. Shundagina xotirjam va xavfsiz bo‘lasiz.

Sarvar SOBIROV,

o‘z muxbirimiz.

Toshkent shahri.