Amerikalik UFC jangchisi Kori Sendxagen nima uchun Umar Nurmuhammedovga qarshi jang qilishga rozi bo‘lganini tushuntirdi.

Sendxagen va Nurmuhammedov o‘rtasidagi jang 3 avgust kuni BAA poytaxti Abu-Dabida bo‘lib o‘tadigan UFC turniri doirasida o‘tkaziladi.

“Birinchidan, men uchun raqiblar unchalik ko‘p emas. Ikkinchidan, Umarni UFC'da yaxshi ko‘rishadi. Menga ham uning janglari yoqadi – u UFC'da yangi, lekin qisqa vaqt ichida e’tibor qozona oldi. Umar o‘ziga xos tarzda tik turgan holatda jang qila oladi. U juda yaxshi kurashchi va mashhur familiyaga ega.  Menga kelsak, grepplingdan qanday himoyalanganimni ko‘pchilik ko‘rmagan. Bu kimdir uchun qiziqarli bo‘lishi mumkin”, deydi Sendxagen.

Ma’lumot uchun, 28 yoshli Umar Nurmuhammedov MMAʼda 17 ta jang o‘tkazib, 17 tasida ham g‘alaba qozongan. 32 yoshli Kori Sendxagen esa 21 ta jangda 17 ta g‘alaba qayd etgan.