Ichki ishlar organlarida o‘tkazilayotgan «Uch avlod uchrashuvi»da yosh, o‘rta va keksa avlod o‘rtasidagi ko‘prikni mustahkamlash borasidagi chora-tadbirlar izchillik bilan davom etmoqda. Xususan, IIV Transport va turizm obyektlarida xavfsizlikni ta’minlash departamentida «Yong‘inning oldini olish bo‘limi tashkil etilganligining 30 yilligi» va «Uch avlod uchrashuvi» ma’naviy-ma’rifiy tadbiri bo‘lib o‘tdi. Yong ‘inning oldini olish bo ‘limi 1994-yilning aprel oyida o‘sha paytdagi IIVning transport militsiyasi tarkibida 25 nafar xodim bilan ish boshlagan. Bo‘lim oldiga temiryo‘l vokzallarida, yo‘lovchi, yuk tashuvchi poyezdlar vagonlari hamda neft-gaz mahsulotlarini yetkazib beruvchi sisternalarda katta yong‘in va talafotlarning oldini olish ishlarini bajarish vazifasi qo‘yilgan. «Uch avlod uchrashuvi»ga tashif buyurgan faxriylarning ko‘pchiligi aynan mana shu yo‘nalishda uzoq yillar samarali xizmat qilib, pensiyaga chiqqan fidoyilar bo‘ldi. 

– Men sohaga endi kirib kelayotgan yoshlarni ustozlar o‘gitiga amal qilib, bilimlarni chuqur o‘zlashtirib, ustoz-faxriylarimizga munosib bo‘lishga, qolaversa, bugungi kunda oliy maqsadlarimizdan biri bo‘lgan «Yangi O‘zbekistonda – Uchinchi renessans» davriga poydevor qo‘yishda faol ishtirok etishga chorlayman! – dedi tadbirni ochib bergan Ichki ishlar vaziri o‘rinbosari, general-mayor Bahodir Mirzarahimov.

Katta hayotiy tajribaga ega insonlar sifatida yosh avlodni vatanparvarlik, kasbiga sadoqat, qonunchilik va xizmat intizomiga qat’iy amal qilish ruhida tarbiyalash borasidagi ishlarga munosib hissa qo‘shib kelayotgan faxriylar chin ma’noda ustoz degan nomga munosibdir. Tadbir yakunida tizimda uzoq yillar davomida mehnat qilgan faxriylarga IIV hamda FVV rahbariyatining tashakkurnomalari va qimmatbaho esdalik sovg‘alari topshirildi. 

Abror POYONOV,

o‘z muxbirimiz.