O‘zbekiston davlat jahon tillari universitetining II bosqich talabasi Mirzabek Elmurodov uyali aloqa vositasini bir daqiqaga so‘ragan erkakka telefonini uzatdi va o‘zganing suhbatiga quloq tutayotgandek ko‘rinmaslik uchun chetlandi. Erkak gaplashib bo‘lgach, o‘z yo‘lida davom etdi.

Mazkur voqeadan bir necha daqiqa o‘tar-o‘tmas Jizzax viloyati IIB xodimi Mirzabek bilan bog‘lanib, hozirgina uning telefonidan foydalangan odam qidiruvdagi shaxs ekanligi, ichki ishlar organi xodimlari yetib borgunga qadar uni kuzatishi kerakligini tushuntirdi. Mirzabek ikkilanmasdan rozi bo‘ldi. Ammo bu paytda erkak ko‘zdan g‘oyib bo‘lgandi. Shu bois u notanish kishi ketgan ko‘cha tomon chopdi. 200 metr yurganidan so‘ng qidirayotgan odamini topdi va uning ortidan kuzatib, yarim kilometrcha yurdi. Ko‘p o‘tmay, ichki ishlar organi xodimlari gumonlanuvchini qo‘lga olishdi. 

M. Elmurodov tutishga yordamlashgan shaxs Zomin tumanining «Nebo‘sa» mahallasida yashovchi U.A. bo‘lib, shu yilning 19-aprel kuni Zarbdor tumanining «Oqbuloq» mahallasida istiqomat qiluvchi B.A.ni pichoqlab, voqea joyidan yashiringandi. Xodimlar gumonlanuvchini tutishga qaratilgan tezkor-qidiruv tadbirlarini amalga oshirishga kirishdilar. Qotillikda gumon qilinayotgan erkak lavhamiz qahramonining telefonidan foydalangan holda turmush o‘rtog‘iga qo‘ng‘iroq qilgani aniqlandi. Bu esa jizzaxlik ichki ishlar organlari xodimlarining O‘zbekiston davlat jahon tillari universiteti talabasi bilan telefon orqali bog‘lanishiga sabab bo‘lgandi. 

Talabaning jur'ati har qancha tahsinga loyiq. 

U «Menga nima», deya qo‘l siltashi, befarqlik pardasi ortiga berkinishi mumkin edi. Demoqchi bo‘lganimiz, jinoyat sodir etgan shaxsni muayyan muddat kuzatib borish hamda uni qo‘lga olayotganlarga yordam ko‘rsatishga har kimning ham yuragi dov beravermaydi.

Qisqasi, jasur yigitni taqdirlashga qaror qilindi. Universitet o‘qituvchi va talabalari ishtirokida yig‘ilish o‘tkazilib, Qashqadaryo viloyati G‘uzor tumani «Apardi» mahalla fuqarolar yig‘inida yashovchi Mirzabek Elmurodovga esdalik qo‘l soati va 5 million so‘m pul mukofoti, shuningdek, uning ota-onasiga tashakkurnoma topshirildi. Xuddi shunday, gumonlanuvchini qo‘lga olgan Toshkent shahri Shayxontohur tumani IIOFMB 5-sonli IIBning 4 nafar xodimi esdalik sovg‘alari bilan rag‘batlantirildi.

Alijon ABDUSATTOROV,

o‘z muxbirimiz.

Jizzax viloyati.