Botir MADIYOROV/'Xalq soʻzi'. Аyni kunlarda mamlakatimizning barcha hududlarida isteʼdodli yigit-qizlarni aniqlashga qaratilgan 'Yoshlar ovozi' tanlovining hududiy bosqichlari boʻlib oʻtmoqda.

Vazirlar Mahkamasining joriy yilning 16-fevraldagi majlisi bayoniga koʻra, yangi avlodning boʻsh vaqtini mazmunli oʻtkazish maqsadida 15-30-aprel kunlari yurtimiz boʻylab 'Besh tashabbus olimpiadasi' doirasida 'Yoshlar ovozi' tanlovi oʻtkazilyapti. Tanlovda ishtirokchilar maqom, baxshichilik, anʼanaviy ijro, opera va estrada yoʻnalishlari boʻyicha oʻz mahoratlarini namoyish etishmoqda.

17-18-aprel kunlari Fargʻona shahrida tanlovning viloyat bosqichi tashkil etildi. Unda 5 ta yoʻnalish boʻyicha gʻolib boʻlgan yigit-qizlar tanlovning respublika bosqichida ishtirok etish huquqini qoʻlga kiritdi.

' Yoshlar ishlari agentligi tomonidan 2021-yili taʼsis etilgan ushbu tanlovning yakuniy bosqichida qatnashish orzuim edi, ' deydi baxshichilik yoʻnalishi gʻolibi Gulruxsor Joʻrayeva. ' Bu yil Qoraqalpogʻiston Respublikasining Boʻzatov tumanida boʻlib oʻtadigan tanlovning respublika bosqichida oʻz isteʼdodimni namoyon etish imkoniga ega boʻlganimdan mamnunman.