Qudratilla Najmiddinov/'Xalq soʻzi'. Hunarmandchilik gullar shahri ahliga ajdodlardan meros. Bu yerda toʻqilgan kamalakrang atlas va adrasni qiz-juvonlar suyib kiyishadi, nozik kashtachilik buyumlarining ham qadri baland. Yangi Namangan tumanining 'Mingchinor' mahallasida yashovchi Hakimjon Tojiboyev ipakchilikka mehr qoʻygan insonlardan. Mato toʻqish va boʻyash hunarining ustasi boʻlgan koʻhna kasb egasi shu yoʻnalishdagi sulolaning uchinchi avlodi sifatida tajribasini sabot bilan yoshlarga oʻrgatib kelayotir. Shu kunga qadar 5 mingdan ziyod shogirdlar yetishtirgan, hozirda 200 nafarga yaqin xotin-qizlarga kashta tikishni oʻrgatib, ularni kasanachilik asosida doimiy mehnat bilan band etgan.

' Qoʻl mehnatiga asoslangan kashtachilikni sanʼatning nodir turlaridan biri sifatida izohlasa toʻgʻri boʻladi, ' deydi H. Tojiboyev. ' Boisi har bir mahsulot koʻz nuri, qalb qoʻri bilan yaratiladi. Mehnati oʻziga yarasha, baʼzilarini tikish uchun ikki-uch yillab vaqt sarf qilishga toʻgʻri keladi. Bahosi ham shunga munosib, kashtasining murakkabligiga qarab 300 ming soʻmdan 130 million soʻmgacha qiymatdagi ishlarimiz bor.

Bugun Hakimjon aka va uning kasanachi shogirdlari qoʻlidan chiqayotgan ellikdan ortiq turdagi kashtachilik buyumlarining dovrugʻi mamlakatimizdan chiqib, Rossiya, Ukraina, AQSH, Turkiya va Yevropaning qator davlatlariga ham yetib borgan.

' Hunar ortidan baraka topdik, uy-joy qildik, mashina oldik, farzand va nabiralar 4-5 avlod sifatida kasbimizni davom ettirmoqda. Qolaversa, Belgiya, Fransiya, Italiya, Turkiya kabi davlatlardagi xalqaro koʻrgazmalarda qatnashib, oʻzbek kashtachilik sanʼatini dunyoga koʻz-koʻz qildim, ' deydi usta faxr bilan.

Hakimjon Tojiboyev mahsulotlar targʻiboti va savdosini yanada kengaytirish maqsadida yaqin vaqt ichida mahalliy va xorijiy sayyohlarni oʻziga jalb etadigan hunarmandchilik markazi tashkil etish niyatida.