AQSH Prezidenti Jo Bayden Ukrainada Amerika qo‘shinlaridan foydalanmaslikka qaror qilganini aytdi. Bu haqda u kecha, 7 mart kuni kechqurun AQSH Kongressi Vakillar palatasi va Senati oldida mamlakatdagi vaziyat haqidagi yillik nutqida ma’lum qildi.

"Ular (ukrainaliklar) amerikalik askarlarni so‘ramayapti. Aslida, amerikalik askarlar Ukrainadagi urushda ishtirok etmaydi va men xuddi shu ruhda davom etishga qaror qildim", deydi Prezident. 

Shuningdek, Bayden agar Qo‘shma Shtatlar Ukrainani qo‘llab-quvvatlasa va uni "o‘zini himoya qilish uchun zarur bo‘lgan qurollar" bilan ta’minlasa, Kiyev Moskva bilan mojaroda g‘alaba qozonishi mumkinligini ta’kidladi. Shu munosabat bilan Bayden yana bir bor AQSH Kongressini Amerika ma’muriyatining Ukrainaga yangi yordam paketi ajratish haqidagi qarorini qo‘llab-quvvatlashga chaqirdi. 

"Agar Qo‘shma Shtatlar hozir Kiyevni qo‘llab-quvvatlashdan chekinsa, bu Ukrainani xavf ostiga qo‘yadi. Biz chekinmaymiz, (Putinga) ta’zim qilmaymiz", deydi u. 

Baydenning ta’kidlashicha, Ukraina AQSH qurol-yarog‘i tufayli Rossiyani to‘xtata oladi.

Eslatib o‘tamiz, 26 fevral kuni Parijda Ukrainaga yordam bo‘yicha konferensiya yakunida so‘zga chiqqan Fransiya Prezidenti Emmanuel Makron Ukraina hududiga Fransiya quruqlikdagi qo‘shinlari kiritilishi mumkinligini istisno etmagandi. NATO Bosh kotibi Yens Stoltenberg esa alyans Ukrainaga askar yuborish niyatida emasligini aytgan. Oq uy Milliy xavfsizlik kengashining strategik aloqalar bo‘yicha koordinatori Jon Kirbi AQSH Prezidenti Ukrainaga qo‘shin yuborishga qarshi ekani, bu har bir davlatning suveren qarori ekanini ta’kidlagandi.