Surxondaryo viloyati IIB Migratsiya va fuqarolikni rasmiylashtirish boshqarmasi bosh inspektori, kapitan Azamat Suvanov ham ana shunday halollikni shior qilgan xodimlardan. U bir emas, uch marotaba o‘zining xizmat vazifasiga sodiqligini namoyon etib, noqonuniy hujjat tayyorlab berishdan bosh tortdi, tamaga qo‘l urmadi. 

Birinchi holat 2023-yil­ning dekabrida sodir bo‘ldi. Afg‘oniston fuqarosi D.Sabir (ism-sharifi o‘zgartirildi) 

qariyb 5 yildan beri ishchi viza asosida oila a’zolari bilan birgalikda Termiz shahrida yashaydi, tadbirkorlik faoliyati bilan shug‘ullanib keladi. U kapitan A.Suvanovning xizmat xonasiga borib, voyaga yetmagan farzandiga noqonuniy ravishda viza rasmiylashtirib berishi uchun xodimga 800 AQSH dollari miqdorida pora taklif qiladi. 

O‘z navbatida, kapitan A.Suvanov unga qonunlari­mizga ko‘ra, o‘g‘li 2023-yil 22-dekabrda 18 yoshga to‘lishini, shu sababli undan O‘zbekiston Respublikasi hududida bo‘lishi uchun pasport vizasi talab qilinishini, shuningdek, pora berish va olish uchun jinoiy javobgarlik belgilanganini tushuntiradi. 

D.Sabir shu kuni yana qay­tib kelib, pora taklif qiladi. Xodim unga qayta tushunti­rish berishiga qaramay, u bu harakatida davom etadi. 

Hamkorlikda o‘tkazilgan tezkor tadbirda D.Sabir 

800 AQSH dollari miqdoridagi pulni pora tariqasida berayotgan vaqtida qo‘lga olindi. 

Joriy yilning yanvar oyida bosh inspektor A.Suvanovga noqonuniy viza muddatini uzaytirish uchun 200 AQSH dollari, yana bir holatda 

«B-2» (biznes viza) ishga kirish vizasini «E» ishchi kirish vizasiga almashtirish uchun 2 million so‘m pul mablag‘i pora sifatida taklif qilinadi. Ammo bosh inspektor birinchi holatdagidek xorijlik fuqarolarga bu harakatlari qonunla­rimizga zid ekanini bot-bot tushuntirishiga qaramay, ular taklif qilishda davom etishadi. 

Keyingi ikkala holatda ham A.Suvanovning bildirgisiga muvofiq, Afg‘oniston fuqarolari ushbu pullarni 

uning xizmat xonasida berayotgan vaqtida ushlandi. 

Feruza RAHMONQULOVA,

o‘z muxbirimiz.

Surxondaryo viloyati.