Kuzatuv

Uzoq yillar davomida yurtimiz tinchlik-osoyishtaligi yo'lida xizmat qilib, yorug' yuz bilan pensiyaga chiqish har bir ona Vatan posbonining bir umrlik orzusidir. Bugun IIV Tibbiyot boshqarmasi tibbiy nazorat va tekshiruv guruhi yetakchi mutaxassis-shifokor-farmasevti, podpolkovnik Rasuljon Abdullayev ham ana shunday izzat-ikrom bilan nafaqaga kuzatildi.

Tadbirda vazirlik tibbiyot boshqarmasi boshlig'i, podpolkovnik Shuhrat Nishanov so'zga chiqib, R. Abdullayevning g'ayrat-shijoat bilan faoliyat yuritgan yillariga bir nazar tashladi. 

U Toshkent farmasevtika institutini tamomlaganidan so'ng, IIV Tibbiyot boshqarmasi Namangan shahridagi Respublika fizioterapiya kasalxonasining dorixona boshlig'i-provizor lavozimida faoliyatini boshlaydi. Keyinchalik, sohadagi bilim va tajribasini yanada boyitgan bu inson rahbariyat tomonidan IIV Tibbiyot boshqarmasi tibbiy ta'minot bo'limi katta mutaxassis-shifokori etib tayinlandi. Shundan so'ng, mazkur boshqarmaning turli rahbarlik lavozimlarida fidoyilik bilan xizmat ko'rsatib, o'zini har jihatdan ijobiy namoyon etgan Rasuljon Abdullayev 2018 yildan to hozirga qadar egallab turgan lavozimida faoliyat yuritdi.

Shuningdek tadbirda xodimning hamkasblari va shogirdlari ham o'zlarining samimiy tilaklarini bildirib o'tishdi. An'anaga ko'ra, R. Abdullayevga to'n kiydirilib, esdalik sovg'alari topshirildi.

Mixli SAFAROV,

o'z muxbirimiz.