Asli Toshkent viloyatida tug‘ilgan Abdulaziz Saliyev bolalikdan biror ishga qo‘l ursa, yakuniga yetkazmaguncha qo‘ymasdi. Uning tirishqoqligiga tengdoshlari havas qilishardi. Lavhamiz qahramoni IIV Toshkent oliy harbiy-texnika bilim yurtini muvaffaqiyatli bitirgach, 7534-harbiy qismda guruh komandiri, vzvod komandirining tarbiyaviy ishlar bo‘yicha o‘rinbosari, 

vzvod komandiri, batalyon 

shtabi boshlig‘ining nazoratchilar xizmati bo‘yicha o‘rinbosari, 7533-harbiy qismda 1-o‘qchi batalyon komandiri lavozimlarida samarali xizmat qildi. 

2017-yildan faoliyatini Navoiy viloyatidagi 7532-harbiy qism komandirining birinchi o‘rinbosari – shtab boshlig‘i sifatida davom ettirgan lavhamiz qahramoni ayni paytda Zarafshon shahridagi 7551-harbiy qism komandiri lavozimida xizmat olib bormoqda. Amaldagi qonun­chilik va Umumharbiy nizomlarga muvofiq ish ko‘rishi, yuksak komandirlik salohiyati tufayli qo‘l ostidagi harbiy xizmatchilari orasida obro‘-e’tibor qozondi. Yillar davomida to‘plagan boy tajribasi va bilimlarini ofitserlarga qunt bilan o‘rgatadi. 

Shaxsiy tarkib o‘rtasida harbiy intizom va qonuniylikni mustahkamlash hamisha uning diqqat markazida. Harbiy xizmatchilarning kasbiy tayyorgarligi va jangovar shayligini oshirishga alohida e’tibor qaratib kelyapti. Bunda o‘quv mashg‘ulotlari va mashqlarining yuqori saviyada tashkil etilayotgani muhim omil bo‘lmoqda. 

Harbiy qismda qisqa vaqt ichida Madaniyat markazi barpo etildi. Undan ma’naviyat va ma’rifat xonasi, vatanparvarlik burchagi, o‘quv zali, kutubxona, psixologik trening xonasi o‘rin olgan. Bundan tashqari, harbiy xizmatchilar uchun mo‘ljallangan yotoqxonalar, maishiy xizmat ko‘rsatish xonalari to‘liq ta’mirlandi. 300 kishiga mo‘ljallangan askarlar oshxonasi yangidan qurilib, foydalanishga topshirildi.  

– Askarlar uchun yashash sharoitlarni yaxshilash borasida amalga oshirgan ishlarimiz kelgusida ularning xizmat samaradorligi yanada oshishida muhim omil bo‘lishi shubhasiz. Qolaversa, askarlarning ota-­onalari ham farzandlarini ko‘rgani kelishganida yaratilgan qulayliklarni ko‘rib mamnun bo‘lishyapti, – deydi polkovnik Abdulaziz Saliyev.

Mahliyo XOLOVA,

o‘z muxbirimiz.

Navoiy viloyati.