Halollikni shior qilgan xodimlar

Do‘stlik tumanidagi Paxtazor yo‘lining 1-kilometrida xizmat olib borayotgan viloyat IIB JXX YHXB YPX batalyoni uchinchi safarbar guruhi yo‘l-patrul xizmati inspektori, safdor Azamat Mamatov yuqori tezlikda kelayotgan «Nexia-3» avtomashinasiga to‘xtash ishorasini ko‘rsatdi. Haydovchining avtoulov harakatini keskin sekinlashtirgani xo­dimni sergak torttirgandi.

YPX inspektori yaqinlashganda, haydovchi ko‘zini olib qochdi, uning xotirjam emasligi avtoulov yuritgichini o‘chirishga urinayotgan qo‘l harakatlaridan sezilib turardi. Muloqot chog‘ida safdor suhbatdoshining ko‘z qorachiqlari kengayganligini payqadi.

Bular hammasi haydovchining mast holatda ekanligiga ishora qilardi. Shu bois qonun himoyachisi Arnasoy tumanining «Do‘stlik» mahallasida yashovchi B.T.ni «Alkostop 8000 S»da tekshiruvdan o‘tkazdi. Qurilma haydovchining spirtli ichimlik ta’sirida ekanligini ko‘rsatdi.

Xodim holat yuzasidan tegishli tartibda bayonnoma rasmiylashtirib, avtomashinani jarima maydoniga qo‘yish choralarini ko‘ra boshladi. Kutilmaganda haydovchidan piyo­daga aylanib qolayotgani B.T.ni cho‘chitib yubordimi, inspektorga 1 million so‘m hamda 400 AQSH dollari miqdorida pora taklif qildi. Buning evaziga safdor bayonnomani yo‘q qilishi hamda avtomashinani jarima maydonchasiga qo‘ymasligi kerak edi.

Inspektor B.T.ning mazkur xatti-harakati qonunga zid ekanligini tushuntirdi. Haydovchi esa: «Erkakchilikda hamma narsa bo‘lishi mumkin», – deya falsafa to‘qib, pora tiqishtirishda davom etdi. Gumonlanuvchi o‘tkazilgan tezkor tadbir davomida haydovchi 1 million so‘m hamda 400 AQSH dollari­ni safdor Azamat Mamatovga pora tariqasida berayotganida qo‘lga olindi. Qisqasi, pul hamma eshiklarni ochishiga ishongan B.T.ning jinoiy javobgarlikka tortilishi naqd bo‘lib turibdi.

Alijon ABDUSATTOROV,

o‘z muxbirimiz.

Jizzax viloyati.