Ukraina rasmiylari Belgorod viloyatida Il-76 halokati oqibatida halok bo‘lgan harbiy asirlarning jasadini qaytarish bo‘yicha Rossiyaga murojaat qilgan, biroq Rossiya tomoni bunga munosabat bildirmagan. Bu haqda Ukraina Mudofaa vazirligi razvedka boshqarmasi vakili Andrey Yusov ma’lum qildi. 

“O‘lim haqidagi ma’lumotlarga kelsak, Ukraina jasadlarni topshirish uchun ariza berdi va ariza berishda davom etmoqda. Hozircha Rossiya tomoni bunga rozi emas. Shu bois davlatimizning nafaqat Il-76 samolyoti qulashi holatlari, balki uning ichida nima bo‘lgani – u yerda odamlar bormi, o‘q-dorilar bormi, kimlar bo‘lgani yuzasidan xolis xalqaro tergov o‘tkazish talabi dolzarbligicha qolmoqda", uning so‘zlarini “Ukrainskaya pravda” keltirdi.

Yusovning ta’kidlashicha, Rossiya Mudofaa vazirligi halok bo‘lgan deb e’lon qilgan 65 nafar ukrainalik askarning maqomi o‘zgarmagan – ular hamon harbiy asirlar sanaladi.

Uning qo‘shimcha qilishicha, 31 yanvar kuni Rossiya va Ukraina o‘rtasida bo‘lib o‘tgan keng ko‘lamli harbiy asirlar almashinuvi Il-76 halokatga uchragan kuni to‘xtatilgan operatsiya deyarli yakuniga yetgan.

Jumladan, ayirboshlash doirasida 24 yanvar kuni almashtirilishi kerak bo‘lgan ukrainaliklar uylariga qaytgan. Rossiya tomoniga ko‘ra, halokatga uchragan samolyot bortida bo‘lganlar ro‘yxatidan 65 kishi bundan mustasno.

Eslatib o‘tamiz, Rossiyaning Il-76 harbiy-transport samolyoti 24 yanvar kuni ertalab Belgorod viloyatida halokatga uchradi. Rossiya Mudofaa vazirligining da’vo qilishicha, bortda Belgorodga almashish uchun olib ketilayotgan 65 nafar ukrainalik harbiy asir, shuningdek, olti ekipaj a’zosi va uch nafar hamroh bo‘lgan. Ularning barchasi, Rossiya rasmiylariga ko‘ra, vafot etgan. 

Rossiya Mudofaa vazirligi Il-76 halokatini terakt deb atadi va bunda Ukraina harbiylarini aybladi. Ukraina hukumati halokat uchun javobgarlikni o‘z zimmasiga olmadi. Ukraina harbiy razvedkasi 24 yanvar kuni Moskva va Kiyev asirlarni almashishga tayyorlanayotganini tasdiqladi va Ukraina tomonida Il-76 bortida kim bo‘lgani haqida ishonchli ma’lumotlar yo‘qligini qo‘shimcha qildi.

Shundan so‘ng, Vladimir Zelenskiy samolyot halokati bo‘yicha xalqaro tergov o‘tkazilishini talab qilgandi.

Bundan oldin ham Putin samolyot Amerika yoki Yevropa mamlakatlariga tegishli qurollar yordamida urib tushirilganini taxmin qilgandi.