Tahlillar shuni ko‘rsatmoq­daki, haydovchi va piyodalarda harakatlanish madaniyatining yo‘qligi ham katta-kichik «probka»larni keltirib chiqarmoqda. Tirbandliklarda harakatlanayotgan avtomashinalarning aksariyatini «Damas» yoki yo‘nalishdagi boshqa transport vositalari tashkil etyapti. Yo‘lovchi mashinalarning ko‘pligi esa jamoat transportining erkin harakatlanishiga xalaqit qil­moqda. Shu sababli hamkor tashkilotlar bilan yo‘llardagi tirbandliklarga chek qo‘yish maqsadida muayyan ishlarni olib boryapmiz. Jumladan, yo‘l-transport hodisalarining oldini olish, harakat ishtirokchilariga qulay sharoit yaratish maqsadida yangi yo‘l belgilari, svetoforlar o‘rnatilyapti, yangi piyodalar o‘tish joylari tashkil etilmoqda. Haydovchi va piyodalarning yo‘llarda harakatlanish madaniyatini oshirishga qaratilgan targ‘ibot tadbirlarini o‘tkazish ham doimiy e’tiborimizda. 

Yo‘llarda tirbandliklarning oldini olish, haydovchilarga qulaylik yaratish maq­sadida viloyat IIB YHXB tomonidan viloyat hokimligiga qator takliflar kiritildi. Chunonchi, Namangan shahrining «Qo‘qon» va «G‘alcha» ko‘chalari kesishmasi o‘rnida aylanma harakatni joriy etish taklifi ilgari surildi. Qolaversa, shu kabi aylanma yo‘llarni «Uychi», Mashrab, Navoiy ko‘chalarida hamda «Marg‘ilon» va Navoiy ko‘chalari kesishgan chorrahalar o‘rnida ham tashkil etishni ko‘zda tutganmiz. Qolaversa, To‘raqo‘rg‘on tumani hududidan o‘tgan 

4R-120 avtomobil yo‘li kesishgan chorraha o‘rnida aylanma harakat yo‘lini bunyod etish tirbandlik muammosiga yechim bo‘lishi mumkin. 

Har qanday muammoning yechimi bor. Umid qilamizki, yuqoridagi kabi takliflarda ko‘zda tutilgan ishlar amali­yotga tatbiq qilinsa, yo‘llar­dagi tirbandliklar, qoidabuzarlik holatlari bartaraf etilishiga erishiladi. 

Botirjon BOYMIRZAYEV,

mayor.

Namangan viloyati.