Ommaviy axborot vositalari xodimlari bilan bir qatorda deputatlar, tadbirkorlar, nuroniylar, sayyohlik, sport, ekologiya sohalari xodimlari, davlat tashkilotlari, jamoatchilik vakillari ishtirok etgan tadbir avvalida viloyat hokimi B. Zaripov iqtisodiy-ijtimoiy jabhalarda amalga oshirilayotgan ishlar haqida atroflicha soʻz yuritib, turizm yoʻnalishidagi imkoniyatlar xususida toʻxtaldi va 'Boqiy Buxoro' turizm etnoparki loyihasi konsepsiyasi ishlab chiqilganini maʼlum qildi.

Taʼkidlanishicha, bu etnopark 32,6 gektar maydonni egallaydi, shuning 23 gektarini yashil zona tashkil etadi. Mazkur loyiha Buxoroning sayyohlik salohiyatini oshirishda muhim ahamiyat kasb etadi. Bu oʻrinda gap avvalo, koʻhna shaharga tashrif buyuradigan mehmonlar hamda mahalliy aholiga qulayliklar yaratish haqida bormoqda. Zero, Buxoro turizmni rivojlantirish borasida juda katta imkoniyatga ega. Shu oʻrinda davlatimiz rahbarining bevosita tashabbusi bilan shahardagi qirqdan ziyod qadimiy yodgorliklarda restavratsiya, qayta tiklash ishlari olib borilayotganini, bu maqsad uchun 160 milliard soʻm ajratilganini taʼkidlash joiz.

Tadbirda soʻz olgan viloyat hokimi oʻrinbosari B. Shahriyorovning maʼlumot berishicha, Buxoroga xorijiy turistlar oqimi keskin koʻpayishi kuzatilyapti. Masalan, 2023-yilda 1 million 387 ming xorijiy sayyoh tashrif buyurdi. Vaholanki, 2016-yil yakunida bu koʻrsatgich 169, 6 ming nafarni tashkil etgan edi. Yetti yil avval sohada 3,5 ming kishi ishlardi, endilikda esa ular soni 52 ming kishiga yetdi. Mehmonxonalar soni esa toʻrt baravarga koʻpaydi. Viloyatga xorijiy sayyohlar sonini 2030-yilga borib 5 million nafarga yetkazish koʻzda tutilmoqda. Bu esa infratuzilmani jadal rivojlantirishni taqozo etadi.

Shundan kelib chiqqan holda toʻplanganlarga xalq deputatlari viloyat Kengashi muhokamasidan oʻtkazilgan 'Boqiy Buxoro' etnoparki loyihasi haqida atroflicha maʼlumot berildi. U qadimiy shaharga yondosh hududda barpo etiladi. Boshqacha aytganda, Buxoro tarixiy markazining mantiqiy davomi vazifasini oʻtaydi.

' Etnopark turistlarni aeroport va temir yoʻl vokzalidan tarixiy markazga qulay harakatlanish imkonini yaratadi, ' dedi jumladan viloyat hokimi oʻrinbosari. ' Tanlangan hududda joylashgan maʼmuriy binolarda faoliyat yurituvchi davlat tashkilotlari binolarini boshqa joyga koʻchirilishi natijasida transport tirbandligi masalasi hal boʻladi, turistlar va aholi uchun yangi saylgoh yuzaga keladi. Turistlarni shahrimizda qolish vaqtini uzaytirish imkoni tugʻiladi, konsert, teatrlashgan tomoshalar, simpozium, forum, yarmarka va turli uchrashuvlar oʻtkazish uchun yangi maydon paydo boʻladi. Hunarmandchilik, savdo va xizmat koʻrsatish yoʻnalishlarida imkoniyatlar kengayadi, minglab ishchi oʻrinlari yaratiladi.

Oʻz navbatida Buxoro tumanining shaharga tutash 'Bogʻidasht' mahalla fuqarolar yigʻini hududida 'Yangi Oʻzbekiston' bogʻi barpo etish rejasi tuzilgan. Shu bogʻ bilan tutash joyda xalqaro andazalarga javob beradigan zamonaviy oʻyingoh barpo etiladi. Shahardagi ikkita yirik sport obyekti qurilishi ham poyoniga yetmoqda. Binobarin, oʻrnini etnopark egallashi kutilayotgan hozirgi stadion va boshqa obyektlar masalasida xavotirga oʻrin yoʻq.

Tadbirda bir guruh faollar, nuroniylar mazkur loyiha haqida ijobiy fikr-mulohazalar bildirib, oʻz takliflarini oʻrtaga tashladilar. Ommaviy axborot vositalari xodimlari tomonidan berilgan savollarga masʼullar tomonidan batafsil javob berildi.

Istam IBROHIMOV, 'Xalq soʻzi'.