Futbol bo‘yicha Tojikiston terma jamoasi Osiyo kubogining 1/8 finalida guruhdan chiqqani va g‘alaba qozongani uchun 450 ming dollar oldi. Bu haqda Tojikiston futbol federatsiyasi (TFF) prezidenti Rustami Imomali o‘zining Telegram sahifasida ma’lum qildi.

Manbaga ko‘ra, chorak finalda Iordaniya termasi ustidan g‘alaba qozongan taqdirda, terma jamoa yana 200 ming dollar bonus oladi. 

“Rustami Imomali buyrug‘iga ko‘ra, guruhdan chiqqanidan so‘ng Tojikiston terma jamoasi 300 ming dollar miqdorida pul mukofoti oldi. Bundan tashqari, Tojikiston terma jamoasi 2023 yilgi Osiyo Kubogi 1/8 finalida Birlashgan Arab Amirliklari ustidan qozonilgan g‘alabadan so‘ng mamlakat futbol federatsiyasi prezidenti Tojikiston terma jamoasi uchun yana 150 ming dollar bonus ajratdi. Agar Osiyo Kubogi chorak finalida Iordaniya termasi ustidan g‘alaba qozongan taqdirda Tojikiston terma jamoasi qo‘shimcha 200 ming dollar oladi”, deyiladi manba xabarida.

Federatsiya rahbarining ta’kidlashicha, agar turnirda keyingi g‘alabalar qo‘lga kiritilsa, Tojikiston terma jamoasi katta sovrinlar bilan taqdirlanadi. 

Qayd etish joiz, Tojikiston terma jamoasi ilk bor Osiyo Kubogida ishtirok etmoqda. Jamoa 28 yanvar kuni BAA termasini mag‘lub etib, chorak finalga chiqdi. Asosiy vaqt va ikkita qo‘shimcha bo‘lim durang (1:1) bilan yakunlangan bo‘lsa, penaltilar seriyasida Tojikiston jamoasi 5:3 hisobida g‘alaba qozondi. 2 fevral kuni bo‘lib o‘tadigan chorak finalda Tojikiston terma jamoasi Iordaniya bilan kuch sinashadi.