Sirdaryo viloyati Mirzaobod tumanidagi avtomobillarga yonilg‘i quyish shoxobchasida sifatsiz yonilg‘i sotilgani aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti ma’lum qildi.
Departamentning Mirzaobod tumani bo‘limi tomonidan “O‘zenergoinspeksiya” Sirdaryo viloyati hududiy boshqarmasining “I.P.” MCHJga qarashli AYOQSHda o‘tkazilgan tekshiruv hujjatlari o‘rganilganda, ushbu "zapravka"da 10 730 litr AI-92 markali avtobenzinning oktan soni bo‘yicha sifat ko‘rsatkichi davlat standarti parametrlariga mos kelmasligi oshkor bo‘lgan.
Shuningdek, MCHJ tomonidan mijozlarga sifatsiz yonilg‘i sotilganligi oqibatida 12 nafar fuqaroning avtotransport vositasiga 103,2 mln so‘mlik moddiy zarar yetkazilgan.
“Mazkur holat yuzasidan Jinoyat kodeksining 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) bilan jinoyat ishi qo‘zg‘atilib, tergov harakatlari o‘tkazilmoqda”, deyiladi xabarda.
Eslatib o‘tamiz, 2023 yilning noyabr oyida Andijon va Buxoroda xalqqa ajratilgan minglab tonna yoqilg‘i o‘g‘irlangan edi.