Madridning “Real” klubi fransiyalik hujumchi PSJ Kilian Mbappega katta maosh taklif qilishga tayyor emas. Bu haqda ESPN xabar berdi.

Manbaga ko‘ra, Madrid klubining Mbappega braziliyalik vinger Vinisius Junior va angliyalik yarim himoyachi Jude Bellingemdan sezilarli darajada ko‘proq pul to‘lash niyati yo‘q. “Qaymoqranglilar” yetakchilari bir mavsumda taxminan 10,5 million yevro maosh oladi.

Eslatib o‘tamiz, avvalroq Kilian Mbappe PSJni tark etib, “Real” bilan shartnoma imzolashga qaror qilgani haqida xabar berilgandi.

Joriy mavsumda fransiyalik futbolchi PSJ safida barcha musobaqalarda 26 ta o‘yin o‘tkazib, 28 ta gol va 6 ta golli uzatmaga mualliflik qildi. “Transfermarkt” internet portali ma’lumotlariga ko‘ra, Mbappening bozor qiymati 180 million yevroni tashkil qiladi.