Gap shundaki, Izboskan tumanidagi Katta qishloq mahallasi oʻrtasidan oqib oʻtuvchi Tentaksoy daryosiga solingan eski koʻprikni bundan yarim asr muqaddam sel yuvib ketgan. Rahbarlarning eʼtiborsizligi tufayli uni taʼmirlash shuncha yildan buyon paysalga solib kelinmoqda. Odamlar daryoning u tomoniga oʻtish uchun 14 kilometr yoʻl bosishga majbur boʻlishmoqda. Husanboy ota keksayu yoshning, ayniqsa ayollarning yoʻl azobini tortayotganini koʻrib, achinadi. Qanchadan-qancha idoralar eshigida sargʻayadi. Ammo bu koʻprikni taʼmirlash uchun mablagʻ berilmaydi. Rahbarlar esa 'Keyingi yil dasturiga kiritamiz' degan vaʼdani berishdan charchashmaydi.

' Hatto sobiq ittifoq davrida Leonid Brejnevga ham shu koʻprikni taʼmirlash yuzasidan ariza yozganman, ' deydi Husanboy ota Orifjonov. ' Mustaqillik yillarida ham deyarli murojaat qilmagan rahbar qolmagan. Ariza boʻyicha kelib koʻrishadi, uzunligi 73 metr, eni 10 metrlik koʻprikni qurish uchun katta mablagʻ talab etilishi bois, ishni orqaga surishadi. Nihoyat 2018-yilda Prezidentimiz Shavkat Mirziyoyevga qilgan murojaatim tufayli muammo hal boʻldi. 6 milliard 734 million soʻm mablagʻ ajratildi, qurilish boshlandi va 2020-yilda koʻprik foydalanishga topshirildi.

Yangi koʻprik Izboskan va Paxtaobod tumani aholisi uchun qulaylik yaratibgina qolmasdan, transport vositalari harakati uchun ham asosiy vosita vazifasini oʻtamoqda. Natijada 500 ming nafardan ziyod aholiga qulaylik yaratilib, uzogʻi yaqin qilindi. Husanboy otaning yarim asrlik murojaati hal etildi.

Mamlakatimizda fuqarolarning huquq va erkinliklari, qonuniy manfaatlarini himoya qilishda Xalq qabulxonalari va virtual qabulxonalarning ahamiyati beqiyos. Mazkur tizimning asosi boʻlgan Prezident virtual qabulxonasi va Xalq qabulxonalari bevosita davlat rahbariga murojaat qilish, xalq bilan doimiy muloqot olib borish, odamlarni qiynab kelayotgan muammolarni oʻz vaqtida samarali hal etishning taʼsirchan mexanizmiga aylandi.

Izboskan tuman Xalq qabulxonasi tomonidan ham aholini qiynayotgan muammolarni oʻrganish, ijobiy hal etish, ularning ariza, shikoyat va murojaatlarida koʻtarilgan masalalarga yechim topish borasida eʼtiborga molik ishlar olib borilmoqda.

Xalq qabulxonasiga Choʻrtonliq mahallasidan Tursunboy Qoʻchqorov maktub yoʻllab, oʻn yildan buyon qishloqda yangi maktab qurishni soʻrab murojaat qilayotganini, lekin biror natija boʻlmayotganini aytgan. Murojaat oʻrganib chiqilgach, koʻp oʻtmay dasturga kiritildi. Tezkor amalga oshirilgan saʼy-harakatlar tufayli qishloq bolalari yangi maktabda qatnay boshladi. 210 oʻrinli maktab Choʻrtonliq mahalla ahliga munosib tuhfa boʻldi.

Bundan tashqari, Oybek mahallada yashovchi Boqijon Mahmudov oʻz murojaatida Izboskan tumanida xususiy shifoxona ochib, aholiga tibbiy xizmat koʻrsatib kelayotganini maʼlum qilgan. Muammo shundaki, aholiga zamonaviy tibbiy xizmat koʻrsatish maqsadida Xitoydan olib kelinayotgan 2 milliard 400 million soʻmlik zamonaviy tibbiy jihozlar 5 oydan buyon bojxona terminali omborxonasida nomaʼlum sabablarga koʻra ushlab turilgan. Bu murojaat ham Xalq qabulxonasi aralashuvi bilan ijobiy hal etildi va tibbiy jihozlar shifoxonaga keltirib oʻrnatildi.

Xalq qabulxonamiz tomonidan respublika miqyosida birinchilardan boʻlib yangicha jarayonlarni amaliyotga tatbiq etishimiz biz kutgandan ham ziyod samara bera boshladi. Yaʼni, Andijon viloyatidagi barcha tashkilot, muassasa rahbarlari bilan kelishilgan holda tumanning eng chekka va olis hududlarida ommaviy sayyor qabullarini oʻtkaza boshladik.

Bevosita aholi istiqomat qilayotgan mahallalarning oʻzida sektor rahbarlari bilan hamkorlikda qabullarni joriy etdik. Natijada oʻnlab murojaat qabul qilinib, barcha soʻrovlar yuzasidan ijobiy yechimga erishdik. Minglab hamyurtlarimiz oʻzlarining uzoq yillar davomida yechimini kutib turgan muammolari hal boʻlganidan xursand boʻlganini koʻrish xizmatimizga berilgan munosib bahodir.

Bir soʻz bilan aytganda, Xalq qabulxonasi instituti xalq bilan muloqotning oʻziga xos, noyob tizimi sifatida jamiyatdagi muammolarni bartaraf etishga, odamlarning oʻz hayotidan rozi boʻlib yashashini taʼminlashga yaqindan yordam bermoqda.

Oybek MELIBOYEV,

Oʻzbekiston Respublikasi Prezidentining Andijon viloyati Izboskan tumanidagi Xalq qabulxonasi mudiri