Germaniya bu yil Ukrainaga harbiy yuklar yetkazib berish uchun 7 milliard yevrodan ko‘proq mablag‘ ajratadi. Bu haqda Germaniya hukumati kansler Olaf Shols va Amerika Prezidenti Jo Bayden o‘rtasidagi telefon suhbatidan keyin ma’lum qildi. 

Ular Ukrainaga moliyaviy, harbiy va gumanitar yordamni davom ettirish zarurligi haqida kelishib olgan. 

Oq uy matbuot xizmati ikkala siyosatchi ham Kiyevni qo‘llab-quvvatlash bo‘yicha sa’y-harakatlarni muvofiqlashtirayotganini ta’kidlagan.

Dastlab, bu yil Ukrainaga kamroq miqdor – 4 milliard yevro ajratish rejalashtirilgan edi. Mudofaa vaziri Boris Pistoriusning iltimosiga binoan mablag‘ miqdori ikki baravar oshirildi.

Bu qaror Germaniya harbiy xarajatlarini yalpi ichki mahsulotning 2,1 foizigacha oshiradi – bu esa NATO talablariga muvofiqdir.

Eslatib o‘tamiz, Oq uy Milliy xavfsizlik kengashining strategik aloqalar bo‘yicha koordinatori Jon Kirbi Qo‘shma Shtatlar Ukrainaga qurol va harbiy texnika yetkazib berishni to‘xtatganini ma’lum qilgandi.