Italiyaning Rim shahrida Birlashgan millatlar tashkilotining Oziq-ovqat va qishloq xoʻjaligi tashkiloti (FAO) qarorgohida ilk marotaba chorvachilikning barqaror transformatsiyasiga bagʻishlangan Butunjahon konferensiyasida ishtirok etayotgan mamlakatimiz vakili bu haqda xabar berdi.

Mazkur tadbirda Oʻzbekistonning Italiyadagi elchixonasi koʻmagida Veterinariya va chorvachilikni rivojlantirish qoʻmitasi delegatsiyasi faol ishtirok etmoqda.

Tadbirda Oziq-ovqat va qishloq xoʻjaligi tashkilotiga aʼzo davlatlar vakillari, xalqaro tashkilotlar, ilmiy muassasalar, rivojlanish agentliklari, fuqarolik jamiyati tashkilotlari va xususiy sektor biznes vakillari, innovatsiyalar, yanada toʻyimli va xavfsiz mahsulotlar ishlab chiqarish yoʻllari boʻyicha taqdimot oʻtkazmoqda. 

Konferensiyaning asosiy maqsadi atrof-muhitga minimal taʼsir koʻrsatadigan arzon chorvachilik mahsulotlari va mahalliy sharoitga chidamli diversifikatsiyalangan chorvachilik tizimini rivojlantirishga hissa qoʻshishdan iborat.

Muloqot davomida chorvachilikning global, mintaqaviy va milliy darajadagi barqaror rivojlanish maqsadlariga erishish yoʻlida tarmoqni barqaror rivojlantirishning strategik yoʻnalishlari boʻyicha axborot va bilim almashinuvini taʼminlash, ilmiy, texnik va moliyaviy resurslarni safarbar etish hamda ustuvor yoʻnalishlarni aniqlash borasida aʼzo davlatlar oʻrtasida tajriba almashinuvi boʻlib oʻtmoqda.

Tadbirda mamlakatimiz vakili ishtirokchilarga yurtimizda chorvachilik tarmogʻida amalga oshirilayotgan islohotlarni tanishtirdi va oʻz takliflarini bildirdi.

Xususan, muhokama qilingan masalalar, jumladan, bioxilma-xillikni oshirish, yer va suv resurslariga boʻlgan talabning ortib borishi va uning yechimini topishda kengroq muloqot zarurligini taʼkidladi.

Shu sababli kelgusidagi xalqaro loyihalarni amalga oshirish va moliyalashtirishda har bir mintaqaning tabiiy joylashuvi, demografik va iqtisodiy holatini hisobga olish lozimligini bildirdi.

Oʻzbekiston tomoni chorvachilik sohasidagi muammolarni hal etishda xalqaro hamjamiyat bilan har tomonlama hamkorlik qilishga tayyor ekanligi xususida maxsus bayonot berdi.