Xalq deputatlari Jarqo‘rg‘on tumani Kengashining navbatdagi sessiyasi bo‘lib o‘tdi. Unda deputatlar tomonidan kuz-qish mavsumiga tayyorgarlik ko‘rish, energiya tejovchi texnologiyalardan foydalanish, energiya samaradorligini oshirish, oziq-ovqat mahsulotlarining sifati va xavfsizligini ta’minlash yuzasidan Jarqo‘rg‘on tuman hokimi E. Avazov hamda hokimning birinchi o‘rinbosari I. Boboqulovlarning axborotlari eshitildi.

Sessiya yig‘ilishida deputatlar mamlakatimizda Prezidentimiz tomonidan kuz-qish mavsumiga tayyorgarlik ko‘rish, muqobil energiyadan unumli va samarali foydalanish borasida chora-tadbirlar ko‘rilayotgani, mazkur sohaga yetarli mablag‘lar ajratilayotgani, joylarda bu ishlarni samarali tashkil etish uchun shart-sharoitlar va huquqiy asoslar yaratilayotganligini alohida qayd etdilar.

Jarqo‘rg‘on tumanida ham bu sohada tizimli ishlar amalga oshirilayotganiligi ta’kidlandi. Kuz-qish mavsumiga tayyorgarlik ko‘rish maqsadida 136,6 km elektr uzatish tarmoqlari, 64 dona transformator punktida mukammal ta’mirlash ishlari amalga oshirilgan. Kuz-qish mavsumida 34,3 mingta aholiga 3,3 ming tonna suyultirilgan gaz yetkazib berilishi rejalashtirilgan.

Shu bilan birga, ishlab chiqarish obyektlari, tadbirkorlik subyektlari va aholi xonadonlarida bosqichma-bosqich quyosh panellari o‘rnatish, iste’molchilarni barqaror elektr energiyasi bilan ta’minlash, ijtimoiy soha obyektlarida isitish qozonxonalarini davlat-xususiy sheriklik asosida modernizatsiya qilish sohasidagi ishlarda kamchiliklar mavjudligi deputatlar tomonidan tanqid ostiga olindi.

Yig‘ilishda deputatlar elektr energiyasi tizimini barqaror ishlashini taminlash borasida belgilangan chora-tadbirlar ijrosini ta’minlash, iste’molchilarga yetkazib berilgan elektr energiyasidan oqilona, samarali va tejamkorlik bilan foydalanishlariga yo‘naltirilgan amaliy tadbirlarni doimiy ravishda o‘tkazib borish lozimligi alohida ta’kidlandi.

Sessiyada shuningdek, aholini sifatli oziq-ovqat mahsulotlari bilan ta’minlash, ichki bozorlarda narx-navoning barqarorligini saqlash, qishloq xo‘jaligi mahsulotlarini yetishtiruvchilarni qo‘llab-quvvatlashga tumanda ustuvor ahamiyat qaratilayotgani qayd etildi.

Sessiya ishtirokchilari tomonidan oziq-ovqat mahsulotlarini uzoq muddat saqlash maqsadida muzlatgichlar sonini ko‘paytirish, buning uchun qo‘shimcha imtiyozli moliyaviy resurslarni jalb etish bo‘yicha takliflar bildirib o‘tildi.

Deputatlar tumanda aholining oziq-ovqat xavfsizligini ta’minlash va mahalliy bozorlarda narx-navo barqarorligini saqlash yuzasidan jamoatchilik nazoratini o‘rnatish, qishloq xo‘jaligi mahsulotlari ustidan sifat nazorati infratuzilmasini rivojlantirish, mahasulotlar eksportini rag‘batlantirishni nazarda tutuvchi qulay muhitni yaratish lozimligini qayd etdilar.

Sessiya yig‘ilishida Oliy Majlis Qonunchilik palatasi Spikeri N.Ismoilov hamda Qonunchilik palatasining bir guruh deputatlari ishtirok etdilar.

Kun tartibidagi masalalar bo‘yicha xalq deputatlari Jarqo‘rg‘on tumani Kengashining tegishli qarorlari qabul qilindi.