Foto: “Xalq soʻzi”

Joriy yilda tuman markazida “Dehqonobod tekstil” korxonasining ish boshlashi Mavluda Mengliyeva uchun ham ayni muddao boʻldi. U hududdagi koʻplab xotin-qizlar qatorida ushbu korxonaga ishga qabul qilindi. Bugun Mavluda Mengliyeva va chevar hamkasblari zamonaviy korxonada mehnat qilishmoqda. Ular tikkan turli kiyim-kechaklar esa dunyo bozorida oʻz oʻrniga ega.

Taʼkidlab oʻtish joiz, “Dehqonobod tekstil” korxonasi 2023-yilda tumanda roʻyobga chiqarilgan eng yirik loyihalardan biri hisoblanadi. Ushbu zamonaviy korxonada turkiya texnologiyasi asosida yiliga qariyb 1,5 million dona erkaklar, ayollar va bolalar kiyim-kechaklari tayyorlanadi. Bu faoliyat ortidan esa hududdagi 500 nafar xotin-qizning doimiy ish bilan taʼminlanishi koʻzda tutilgan.

— Korxonamiz “Zarafshon tekstil” korxonasi negizida barpo etilgan, — deydi “Dehqonobod tekstil” korxonasi bosh texnologi Nejme Degermani. “Zarafshon tekistil” korxonasi mamlakatimizdagi eng yirik tekstil korxonalaridan biri hisoblanadi. Shu vaqtga qadar ushbu korxona 10 ta hududda oʻz filiallarini ishga tushirgan edi. “Dehqonobod tekstil” korxonasi esa bu borada oʻn ikkinchisi boʻldi.

Turkiyalik mutaxassisning qoʻshimcha qilishicha, ayni vaqtda korxonada oyiga 170 ming donaga yaqin ayollar va erkaklar futbolkalari tayyorlanmoqda. Ularning asosiy qismi yevropa davlatlariga eksport qilinayotgan boʻlsa, qolgani ichki bozorga yoʻnaltirilyapti. Bu faoliyat ortidan esa 375 nafar kishining doimiy ish bilan bandligi taʼminlangan.

— Bundan tashqari, yana 175 nafar chevar uchun tikuv mashinalarini olib kelib oʻrnatdik, — deydi u. – Shu bois yana ishchilarni qabul qilyapmiz. Shuni ham aytishim joizki, boshqa hududlardagi filiallarimizda ham ishlab koʻrganman, ammo dehqonobodlik xotin-qizlar tikuvchilikka juda usta ekan. Ular ikki-uch kuni ichida ishni toʻliq oʻzlashtirib, darhol faoliyatga kirishib ketmoqda. Bu yerda xodimlar tanlashda umuman muammo kuzatilmadi.

Jahongir BOYMURODOV, “Xalq soʻzi”.