Фото: Президент Матбуот хизмати

Qatar Davlati Amiri shayx Tamim bin Hamad Ol Soniyning 5-iyun kuni mamlakatimizga amalga oshirgan davlat tashrifi doirasida “Oʻzbekiston Respublikasi Hukumati bilan Qatar Davlati Hukumati oʻrtasida huquqiy sohada hamkorlik qilish toʻgʻrisidagi Bitim”ni amalga oshirish maqsadida Oʻzbekiston Respublikasi Adliya vazirligi va Qatar Davlati Adliya vazirligi oʻrtasida 2023 — 2025-yillarga moʻljallangan hamkorlik dasturi imzolandi.

Hamkorlik dasturida ikki davlat vazirliklarining asosiy vazifalaridan kelib chiqib tegishli sohalarda hamkorlikni jadallashtirish, ularni amaliy va natijador tadbirlar bilan boyitish nazarda tutilgan.

Dastur doirasida ikki davlatda adliya tizimi samaradorligi uchun joriy qilinayotgan innovatsion yondashuvlar, norma ijodkorligi, tajriba almashish boʻyicha oʻquv dasturini ishlab chiqish va amalga oshirish, fuqarolarning huquqiy ongi va huquqiy madaniyatini oshirish, yuridik xizmat koʻrsatish, yuridik kadrlarni tayyorlash va malakasini oshirish, maʼmuriy tartib-taomillarni takomillashtirish hamda adliya tizimini raqamlashtirish boʻyicha hamkorlik qilish rejalashtirilmoqda.

Shuningdek, ilgʻor tajribalar bilan almashish maqsadida hamkorlikda tadbirlar, xususan, konferensiyalar, seminarlar, treninglar tashkil etish va oʻtkazish, bir-birlarining xalqaro tadbirlarida ishtirok etish hamda qoʻshma tadqiqotlarni tashkil etish va oʻtkazish nazarda tutilgan.

Ushbu Hamkorlik dasturining imzolanishi koʻp qirrali Oʻzbekiston-Qatar munosabatlarining adliya va huquq sohasini yanada rivojlantirishga xizmat qiladi.