Foto: «Xalq so‘zi»

So‘nggi yillarda respublikamizda, jumladan, Andijon viloyatida aholini toza ichimlik suvi bilan ta’minlash ko‘lami ortgan. Biroq, bu hududlar yuz foiz suvlashdi, degani emas. Afsuski, ichimlik suvi yetib bormagan manzillar ham bor. Joylarda hamyurtlarimizning “obi hayot”ga bo‘lgan ehtiyojini qondirish uchun eng avvalo, moliyaviy barqarorlik hukm surmog‘i kerak. Bu esa, ayrim hollarda aholining foydalanilgan toza ichimlik suvi hamda ko‘rsatilgan oqova suv xizmati uchun to‘lovlarni o‘z vaqtida amalga oshirishlari bilan bog‘liq. Tan olish kerak, respublikamizda bu borada yechimini kutib turgan muammolar yo‘q emas. Misol uchun, Andijon viloyatida iste’molchilarning qarzdorligi 150 milliard so‘mni tashkil etmoqda.

- “Andijon suv ta’minoti” MCHJ tomonidan iste’molchilarga bir oyda 9 ming 742 m3 toza ichimlik suvi yetkazib berilmoqda, - deydi jamiyatning markaziy iste’molchilar bo‘limi rahbari Shoyatbek Shermirzayev. -Buning uchun 11 mlrd 781 mln. so‘m miqdorida moliyaviy sarf-harajatlar amalga oshiriladi. Xizmat faoliyatidagi sifat me’yorini ta’minlash uchun aholidan bir oyda 12 mlrd. 879 mln. so‘mlik to‘lovlar undirilishi kerak bo‘lgani holda, hozirda bu ko‘rsatkich o‘rtacha 6 mlrd. 833 mln. so‘mni tashkil etyapti. Bu esa hududlarni suvlashtirish, ta’minotdagi muammolarga barxam berishda salbiy ta’sir ko‘rsatmoqda. Yuzaga kelgan muammoni bartaraf etish bo‘yicha manzillarda targ‘ibot va tashviqot ishlari amalga oshirilyapti. Shunday bo‘lsada, aholi tomonidan to‘lovlarni o‘z vaqtida bajarish masalasi muammoligicha qolmoqda.

Viloyatda aholiga sifatli xizmat ko‘rsatish, ya’ni toza ichimlik suvini o‘z vaqtida yetkazib berish aholining ko‘rsatilgan xizmat uchun to‘lovni o‘z vaqtida amalga oshirishi bilan bog‘liq. Yuqorida sanab o‘tilgan holatlar mavjud ekan, muammolarning yuzaga kelishi turgan gap. Shunday ekan, qarzdorlikni so‘ndirish bilan bog‘liq masalalarni har bir oila, fuqaro o‘zidan boshlamog‘i maqsadga muvofiqdir.

Saminjon HUSANOV, “Xalq so‘zi”