Foto: Arxiv surat

Bahor kelib, kunlar isiy boshlashi bilan koʻpchilikda vitamin yetishmasligi kuzatiladi. Bu esa tanada holsizlik va kuchli charchoq alomatlari bilan namoyon boʻladi.

— Darhaqiqat, bunday belgilar erta bahor fasliga xos boʻlib, aksariyat insonlarni bezovta qiladi, — deydi tibbiyot fanlari nomzodi Feruza Tohirova.

— Biroq ushbu holatni faqat “ilik uzildi” mavsumi bilangina bogʻlash toʻgʻri emas. Sababi umumiy holsizlik bir qator infeksion va noinfeksion kasalliklarning ilk belgisi boʻlishi mumkin. Yuqumsiz endokrin (qandli diabetning ikkinchi turi) va xavfli oʻsma xastaliklari, revmatizm, revmatoid artrit, kamqonlik, yurak qon-tomir kasalliklari shular jumlasidan.

Bemor hayotiga xavf soladigan qandli diabetning ikkinchi turi (qondagi qand miqdorining oshib ketishi) koʻpincha 40 va undan katta yoshdagi kishilarda uchraydi. Bunga nasliy moyillik yoki notoʻgʻri ovqatlanish, semizlik, kamharakatlik, asabiy zoʻriqish kabilar sabab boʻladi.

U yashirin kechadi, lekin bosh miya, koʻz tubi, yurak, buyrak, hamma yirik va mayda arterial qon-tomirlar shikastlanib boradi. Bu patologik jarayon yurak qon-tomir va buyrak yetishmovchiligiga olib keladi.

Surunkali V va S virusli gepatitlar (jigar kasalliklari) esa yuqumli boʻlib, inyeksiya orqali, qon quyishdan, homilador onadan bolaga yuqishi mumkin. Xastalik yashirin kechgani bilan bemorda kundan-kunga umumiy holsizlik kuchayib boradi.

Agar sizni surunkali charchash sindromi bezovta qilsa, darhol shifokorga murojaat qiling. Tibbiy koʻrik jarayonida mutaxassis holsizlik sabablarini aniqlashda yordam beradi.