“103” xizmati faoliyatini takomillashtirish, sohani malakali kadrlar bilan taʼminlash borasidagi ijobiy oʻzgarishlar yurtimizda aholiga xalqaro andozalarga mos tarzda tez tibbiy yordam koʻrsatish imkonini bermoqda.

Birgina misol. Bugungi kunda “Tez yordam”da bitta chaqiriqqa dori-darmon uchun ajratilayotgan mablagʻ 16 barobardan ziyodga ortib, oʻrtacha 8000 soʻmni tashkil qilmoqda. Vaholanki, bu mablagʻ 2016-yil oʻrtacha 500 soʻm edi.

Shuningdek, bundan 7 yil avval yurtimizda atigi 818 ta “Tez yordam” shoxobchasi faoliyat yuritgan boʻlsa, ayni paytda ular soni 1455 taga yetdi. Qolaversa, bugunga kelib, “103” brigadalari jami 2755 tani tashkil qilmoqda. Vaholanki, bu raqam ham 2016-yilda 1648 ta edi.

Yana bir gap. Bundan 6-7 yil avval yurtimiz tez tibbiy yordam tizimida 1868 ta avtomashina bor edi. Bugun esa 2865 ta avtomobil aholiga sifatli xizmat koʻrsatyapti. Shuningdek, maxsus avtomashinalar parki 60-70 foizga yangilandi. Foydalanilayotganiga 8 yildan oshgan avtotransport vositalarini zamonaviylariga almashtirish ishlari esa bosqichma-bosqich davom ettirilyapti.

Qolaversa, 7 yilda “Tez yordam”da reanimobillar soni 24 tadan 500 taga koʻpaydi. Jumladan, joriy yil Respublika tez tibbiy yordam markazi “Jizzakh Auto” tomonidan ishlab chiqarilgan 337 ta “Volkswagen Caddy” mashinalari bilan bilan boyidi.

Bundan tashqari, oxirgi yillarda “103” brigadalari dislokatsiyasi qayta koʻrib chiqilib, aholi yashash punktlariga yaqinlashtirildi. Natijada oʻtgan 6 yil davomida xizmat koʻrsatish radiusi oʻrtacha 13-15 kilometrdan 5-6 kilometrga qisqardi.

“103” raqami markazlashtirilishi hamda muvofiqlashtiruvchi dispetcherlik xizmati — “Call markaz»lar tashkil etilishi orqali esa “Tez yordam”ning kechikishi 40 foizdan 20 foizgacha kamaydi.

Eng muhimi, sohadagi islohotlar 2023-yilda ham izchil davom ettiriladi. Jumladan, tizimdagi eskirgan avtoulovlarni bosqichma-bosqich zamonaviylariga almashtirish choralari koʻriladi.

Unga koʻra:

Aholiga yanada sifatli tibbiy xizmat koʻrsatish maqsadida “Tez yordam” uchun yana 1000 dona A toifali zamonaviy avtomashina xarid qilinishi koʻzda tutilgan. Ushbu maqsadda Osiyo taraqqiyot banki loyihasi asosida kredit mablagʻlari ajratilgan. Bu orqali tizimdagi “Damas” avtomobillari toʻliq yangilanadi.

Shuningdek, olis va chekka hududlar, togʻli va choʻl mintaqalarida ushbu sohani rivojlantirish, tizim xodimlarining xizmat koʻrsatish imkoniyatini oshirish maqsadida maxsus yoʻl tanlamas avtomobillar olib kelinadi.

Yana bir yangilik. Joriy yil “103” xizmatida yagona Call-markaz tashkil qilinadi. Sohada kompleks axborot tizimlarini joriy etish maqsadida ularda yagona intellektual chaqiruv platformasi yaratiladi. Shu bilan birga, xizmat avtotransportlari uchun GPS yordamida sunʼiy yoʻldosh monitoringi tizimi yoʻlga qoʻyilmoqda.