Foto: «Халқ сўзи»

Joriy yilning 29-dekabr kuni hukumat delegatsiyasining ishchi tashrifi doirasida Ostona shahrida Oʻzbekiston Respublikasi Bosh vazirining oʻrinbosari – investitsiyalar va tashqi savdo vaziri Jamshid Xodjayev Qozogʻiston Respublikasi Bosh vaziri Alixan Smailov bilan muzokaralar oʻtkazdi. Muloqot davomida asosiy eʼtibor Qozogʻiston Prezidenti Qosim-Jomart Toqayevning yaqinda Oʻzbekistonga amalga oshirgan tashrifi yakunlari boʻyicha ikki Davlat rahbarlarining berilgan topshiriqlarini bajarishga qaratildi.

Alixon Smailov tashrif natijasida ikki tomonlama hamkorlikning barcha ustuvor yoʻnalishlari boʻyicha yirik kelishuvlarga erishilganini taʼkidladi. Ularning amalga oshirilishi maxsus ishlab chiqilgan “Yoʻl xaritasi”da batafsil bayon etilgan boʻlib, respublikalar oʻrtasidagi strategik sheriklikni yanada mustahkamlashga turtki boʻlib xizmat qiladi.

Tomonlar oʻzaro savdo munosabatlarini rivojlantirishdagi ijobiy dinamikani, ikki mamlakat ishbilarmon doiralari oʻrtasidagi oʻzaro hamkorlik faol chuqurlashib borayotganini qayd etdilar. Shu oʻrinda yangi qoʻshma loyihalarni ishlab chiqish va amalga oshirish boʻyicha tashabbuslarni hukumat darajasida qoʻllab-quvvatlash muhimligi taʼkidlandi.

Muloqot chogʻida ikki tomonlama hamkorlikning turli dolzarb masalalari ham muhokama qilindi. Oʻzbekiston tomoni mamlakat hukumatining oʻzaro manfaatli hamkorlikning ustuvor yoʻnalishlari boʻyicha mushtarak maqsad va natijalarga erishish uchun Qozogʻiston hukumati bilan yaqin hamkorlikda samarali ishlashga tayyorligini bildirdi.

Uchrashuv yakunida Qozogʻiston Respublikasi Bosh vaziri ikki davlat prezidentlarining 2022-yil 21-22-dekabr kunlari boʻlib oʻtgan muzokaralari yakunlari boʻyicha erishilgan kelishuvlarni amalga oshirish boʻyicha “Yoʻl xaritasi”ni imzoladi. Oʻzbekiston tomonidan mazkur hujjat Oʻzbekiston Respublikasi Bosh vaziri tomonidan imzolanadi.