Foto: Xalq so‘zi

Fargʻona viloyat hokimi Xayrullo Bozorov amaliy tashrif bilan kelgan Yaponiyaning “Sanctuary” va “DS Drone School Osaka” kompaniyalari rahbari Uemura Masatoni qabul qildi.

Uchrashuvda Yaponiya kompaniyasi ishtirokida Fargʻona viloyatida “aqlli” qishloq xoʻjaligi tizimini joriy etish, sohaga ilgʻor axborot texnologiyalarini tatbiq qilish, dronlar orqali ekinlarni parvarishlash kabi vazifalar istiqboli koʻrib chiqildi.

Oʻz navbatida Uemura Masato Fargʻona viloyatida klasterlar hamda fermer xoʻjaliklari uchun dronlar orqali dalalarda ekin parvarishi yuzasidan maʼlumot yigʻish hamda tahliliy monitoring yuritish, shuningdek, Yaponiyada ishlab chiqarilgan 30 kg yuk koʻtarish quvvatiga ega qishloq xoʻjalik dronlari orqali ekinlarni kimyoviy oʻgʻitlash xizmatini tashkil etishga amaliy yordam berish uchun tayyor ekanini maʼlum qildi.

Taʼkidlab oʻtilganidek, dastlabki bosqichda amaliy samaradorlikni koʻrsatish uchun ushbu xizmatlar bepul taqdim etiladi. Shundan soʻng klaster korxonalari rahbarlari bilan shartnoma asosida ish olib borish rejalashtirilmoqda.

Yuzma-yuz muloqotda Fargʻonada qishloq xoʻjaligi sohasiga ixtisoslashgan dronchilar tayyorlash maktabini tashkil etish hamda muvaffaqiyatli bitiruvchilarga xalqaro sertifikatlar berish tizimini joriy qilish masalasi ham muhokama qilindi.

Botir Madiyorov, “Xalq soʻzi”.