Foto: Xalq so‘zi

Tan olish kerak, bugungi kunga qadar respublikamizdagi barcha shahar va tumanlardagi mavjud koʻp qavatli uylarda issiqlik manbai abgor holatda edi. Ayniqsa, viloyatlarda xonadonlarni koʻmir bilan isitish odatiy holga aylanib qolgandi. Bu esa, tabiiyki, yongʻin xavfsizligi qoidalariga zid boʻlib, aholi bunday qaltis vaziyatlarni bartaraf etish imkoniyati cheklangani bois tang holatda yashashga majbur edilar. Andijon viloyatida bu kabi muammolarga barham berish, hamyurtlarimizning yashash sharoitlarini yaxshilash borasida bir qancha ishlar amalga oshirilmoqda. Jumladan, koʻp qavatli uylarni issiqlik manbai bilan taʼminlash chorasi koʻrilyapti. Misol uchun, Asaka tumanida energiya tejovchi qurilma orqali xonadonlarni isitish imkoniyati yaratilmoqda. 25 mlrd. soʻmlik loyiha asosida barpo etilayotgan markaziy qozonxona 30 ta koʻp qavatli uylar muammosiga yechim topadi.

— Viloyatdagi mavjud koʻp qavatli uylarni issiqlik manbai bilan taʼminlash borasida 34 ta ishchi guruhi tashkil etilgan boʻlib, ular 12 ta soha vakillaridan tarkib topgan, — deydi viloyat uy-joy kommunal xizmat koʻrsatish boshqarmasi boshligʻining oʻrinbosari Shohruxbek Ibrohimov. — Ular tomonidan shu kungacha mavjud muammolarning 75 foizi barham topdi. Qolganlari yuzasidan avgust-oktyabr oylarida qishki mavsumga tayyorgarlik jarayonlari boshlab yuborilgan. Jumladan, Asaka tumanidagi Amir Temur nomli mahallada markaziy qozonxona qurilishi ishlari davom etmoqda. Shu kungacha 3 ta qozon oʻrnatilib, 7 km. masofaga gaz, 2 km.ga issiqlik tarmogʻi tortildi. Qolaversa, yangi elektr transfarmatori oʻrnatildi. Ayni paytda qurilish-montaj ishlari olib borilmoqda. Loyiha foydalanishga topshirilgach, 1034 ta xonadon nafaqat, issiqlik manbai bilan, balki issiq suv bilan ham taʼminlanadi. Shu bilan birga 6 ta ijtimoiy soha obyektlari, 3 ta maʼmuriy binolar ham ana shunday imkoniyatga ega boʻladi.

Issiqlik manbai bilan bogʻliq ish jarayonlari oktyabr oyining soʻnggi qadar davom etadi va aholi 1-noyabrdan boshlab qulay sharoitga ega boʻladi.

Saminjon HUSANOV, “Xalq soʻzi”