Samarqand, Qoraqalpog‘iston, Qashqadaryo — bu 2022-yilning boshidan may oyining 12 sanasiga qadar prezident Shavkat Mirziyoyev tashrif buyurgan viloyatlar edi. Davlat rahbari 12-may, payshanba kuni erta tongdan Farg‘ona tomon yo‘l oldi. Safar davomida borilishi rejalashtirilgan joylar ko‘p va xilma-xil edi. Prezident tashrifning ilk kunidayoq qishloq xo‘jaligi, hunarmandchilik, to‘qimachilik tarmoqlaridagi korxonalar faoliyati bilan tanishdi, shuningdek, bunyodkorlik ishlarini ko‘zdan kechirdi. Xo‘sh, Shavkat Mirziyoyevning Farg‘onaga tashrifining birinchi kuni qanday o‘tdi? “Daryo” muxbirlari voqea joyidan reportaj tayyorladi.

12-may, soat 9:00. Prezident faoliyatini yaqindan yoritib boruvchi jurnalistlar guruhi davlat rahbari borishi rejalashtirilgan manzil — Furqat tumani, “Qo‘qonboy” mahallasidagi “Usta Yusufjon naqqosh” oilaviy korxonasiga yetib bordik.

Keng hovlida joylashgan so‘rilar oldidan o‘tib, ko‘zimiz o‘ymakor naqshlarga tushdi. Bizga ma’lum qilishlaricha, bu yerda milliy hunarmandchilik yo‘nalishida yog‘och o‘ymakorligi maktabi ham tashkil etilgan ekan.

Shuningdek, e’tiborimizni tortgan asosiy buyum — hashamatli ayvon so‘ri bo‘ldi.

Ushbu ayvon so‘ri kamida 70 million so‘mga baholanar ekan. Prezident tashrif buyurgan usta Muhammadalining maktabida aynan shunday ishlar qilinmoqda. Qilinayotgan ishlar yarim yoki bir yilda emas, kamida 4-5 yilda bunyod bo‘ladi. Ushbu jarayonlarni ko‘rib, bilganimiz bizga bir so‘zni aytishga undadi — sabr.

O‘zbekiston xalq ustasi Muhammadali Yunusovning ta’kidlashicha, ushbu korxonaga uyushmagan yoshlar ko‘proq jalb etiladi. “Shularni ish bilan band qilyapmiz, ishga yondoshtiryapmiz. Ular kelgan kundan daromadga kiradi, pulini oladi. Ustaxonamizning hisobidan shularga oyligini chiqarib beramiz. 1-2 yil davomida ishlasa, oyligini oshirib olishi mumkin”, — deydi usta.

Boriladigan obyektlar ko‘p, vaqt esa kam. Davlat rahbari ushbu korxonadan chiqib, navbatdagi manzilga yo‘l oldi. Biz esa prezident borishi rejalashtirilgan boshqa manzilga borib, ushbu obyekt haqida ma’lumotlar to‘plab turdik.

Prezident Buvayda tumanidan so‘ng Uchko‘prikka keldi, bu galgi manzil — “Boboshbek” mahallasidagi “Yengil sanoat mahsulotlari ishlab chiqarish va logistika markazi” edi.

Ma’lumot uchun, mazkur hududda 2 gektar maydonda 2 ta logistika markazi tashabbuskorlari tomonidan amalga oshiriladi. Korxonaning ishga tushirilishi natijasida yiliga 876 milliard so‘mlik mahsulot ishlab chiqariladi. Eksport hajmi 18,5 million dollarni tashkil etadi. Yiliga budjetga 106,5 milliard so‘m mablag‘ tushadi.

Davlat rahbari sexlarda faoliyat olib borvyotgan xotin-qizlar bilan ham muloqot qildi. “Har bitta yo‘nalishimiz ertangi kunga zamin yaratadi. Tasavvur qilinglar, bir yildan so‘ng mahsulotlaringizni bozori chaqqan bo‘ladi. Sifat o‘zgaradi, talab o‘zgaradi, bozori ham bo‘ladi. Tayyor bozorga chiqib sotish mumkin bo‘ladi”, — deydi Shavkat Mirziyoyev.

Davlat rahbari shu yerning o‘zida hokim yordamchilari bilan ham suhbatda bo‘lib, davlat xizmatchilari o‘zgarishi kerakligi, o‘zgarmaydigan odamlarga joy yo‘qligini aytdi.

“Hozir falonchining o‘g‘li, falonchining jiyani, degan gap yo‘q. Barchamiz xalq xizmatchisimiz. Yaxshi ishlagan odam o‘z o‘rnida ko‘proq qoladi, rag‘batlantiramiz. Yaxshi ishlamagan odamni esa lavozimida olib qolmaymiz. U xalq xizmatchisi bo‘lmasa, ishlamaydi”, — deydi davlat rahbari.

Shavkat Mirziyoyev borishi reja qilingan navbatdagi manzillar hali ko‘p edi. Biz jurnalistlar guruhi davlat rahbarining har bir tashrifini kengroq yoritish maqsadida guruhlarga bo‘lingandik. Guruhimiz bilan birga Toshloq tumanidagi Agro Impex Valley MCHJ tomon yo‘l oldik.

Korxona egalarining aytishicha, bu yerlar haqiqiy toshloq joy bo‘lgan. Tadbirkorga berilgan imkoniyatlar sabab rejalar real voqelikka aylangan. Korxona rahbari Sherzod Botirovning so‘zlariga ko‘ra, bu yerda 70 ta ish o‘rni yaratilgan.

“Biz bu ishlarimizning 90 foizdan ko‘prog‘ini eksport qila olamiz. 25 yillab tadbirkorlik qildik. Rosa qiynalgan kunlarimiz bo‘lgan. So‘nggi 5 yilda hech kim tekshirgani kelmadi, aksincha nima yordam deb kelishdi”, — deydi tadbirkor.

Prezident 2020-yilda ishga tushirilgan, qiymati 100 milliard so‘mdan ziyod bo‘lgan korxona bilan yaqindan tanishdi. Bu yerda “Amira tekstil” belgisi ostida tayyor kiyim–kechaklar ishlab chiqarilmoqda. Shuningdek, yozgi poyabzallarning ustki qismi ham tayyorlanadi.

Davlat rahbari shu yerda Toshloq tumanida ishlab chiqarilayotgan sanoat va hunarmandchilik mahsulotlarini ko‘zdan kechirdi.

Shavkat Mirziyoyevning Farg‘ona viloyatidagi ilk kuni shu yerda yakunlandi.