Namanganda oltmish birinchi bor o‘tkaziladigan xalqaro gullar festivaliga 1,5 milliondan ortiq mehmon kelishi kutilmoqda. Bu haqda Namangan viloyati hokimining turizm va madaniy meros masalalari bo‘yicha o‘rinbosari Botir Nuriddinov ma’lum qildi, deya xabar beradi “Daryo” muxbiri Azizbek Abduvaliyev.

Nuriddinovning aytishicha, festival ilk bor ikki hafta — joriy yil 22-maydan 5-iyunga qadar davom etadi. Oldinlari bu muddat ikki-uch kun, o‘tgan yili esa bir haftadan iborat bo‘lgandi.

“2021-yili festivalga 20 davlatdan mehmonlar kelgandi. Bu yil 30 dan ortiq mamlakatdan mehmonlar kutyapmiz. Diplomatik korpus vakillari, Namangan bilan birodarlashgan viloyat va shaharlar mutasaddilari, qo‘shma korxonalarimizning chet ellik rahbarlariga taklifnomalar yuborilgan. Bayramda ishtirok etadigan gulchilar geografiyasi ham kengaydi: o‘tgan yili eronlik gulchilar ko‘rgazmasi bilan qatnashgan bo‘lsa, bu yil Polsha, Janubiy Koreya, Hindiston, Italiya va Germaniya gulchilari ishtirok etadi”, — deydi Botir Nuriddinov.

Festival bo‘lib o‘tadigan Namangan shahridagi Bobur nomli bog‘da 10 million, shahar ko‘chalarida 10 million, jami 20 million gul va ko‘chatlar ekilmoqda.

Shuningdek, shahar ko‘chalari turfa xil installyatsiyalar bilan ham bezatilmoqda.

“Daryo” muxbirining “Kelayotgan mehmonlar oqimi ko‘paygani yaxshi, biroq ularni joylashtirish masalasi nima bo‘ladi?” degan savoliga javoban viloyat hokimining o‘rinbosari quyidagilarni bildirdi:

“Hozirgi kunda Namangandagi 25 ta mehmonxona 2,5 mingdan ortiq mehmonni qabul qilish imkoniyatiga ega. Yana 5 ta mehmonxonani tadbir arafasida ochish taraddudidamiz. Namangan shahri va shaharga tutash tumanlarda joylashgan oilaviy mehmon uylariga ham alohida e’tibor qaratiladi”.

Mehmonlarga xizmat ko‘rsatish uchun jami 60 kishidan iborat volontyorlar guruhi shakllantirilmoqda. Xorijiy tillarni puxta o‘zlashtirgan yoshlar shaharning mo‘jaz xaritalari va bukletlar bilan ta’minlanadi.

Festivalning madaniy dasturi ham boy va qiziqarli bo‘lishi kutilmoqda. Bobur nomli bog‘, “Afsonalar vodiysi” parki va Alisher Navoiy nomli viloyat musiqali drama teatri oldida o‘rnatiladigan sahnalarda shoir va yozuvchilar, sirk ustalari, o‘zbek estradasi yulduzlari va folklor ansambllari chiqishlari namoyish etiladi.

Festival yakunida tadbirda munosib ishtirok etgan gulchilar va korxona-tashkilotlar 12 ta nominatsiya bo‘yicha taqdirlanadi. Oliy o‘rinlarni egallaganlarga avtomobillar topshirilishi ko‘zda tutilgan.