2022-yilning 20—28-aprel kunlari birinchi marotaba Toshkent shahrida O‘zbekiston volontyorlarining festivali o‘tkazilmoqda. Unda hududiy volontyorlar tomonidan keltirilgan milliy kiyimlar, gullar va turli kitoblar ko‘rgazmasi bo‘lmoqda. Quyida “Daryo” muxbiri tomonidan tayyorlangan fotoreportajni taqdim etamiz.

“Bugun butun respublikadan volontyorlar kelgan. Bir vaqtning o‘zida ko‘ngillilar jamoasi ko‘rgazmalar tashkil qilib, kitob va turli qo‘l mehnati bilan yasalgan buyumlarni sotib, tushgan pullarni xayriya uchun yig‘ishmoqda. Ham biz uchun amaliy konferensiyalar tashkil qilingan. Biz juda ham ko‘p energiya va motivatsiya olyapmiz. Yana bugun boshqa volontyorlar guruhlari bilan tanishyapmiz. Ulardan bilmaganlarimizni o‘rganish uchun yaxshi imkoniyat bo‘lyapti. Hatto jamoamizga yangi volontyorlar ham qo‘shilyapti”, — deydi “Dunyoga keraksan” volontyorlar jamoasi tashkilotchisi Safina Islomova.

“Bunday festival bizga katta kuch beradi. Bugun jamoamiz bilan qatnashyapmiz, o‘zimiz uchun ochilmagan qirralarni ochib, ancha ma’lumotga ega bo‘ldik. Kelgusida shu kabi volontyorlar uchun festivallar ko‘payishiga umidvorman”, — dedi “Baxt ulash” loyihasi asoschisi Mo‘tabar Xushvaqtova.