Foto: Халқ сўзи

Gap Buxoro viloyati Qorakoʻl tumanidagi “Shoʻrobod” mahalla fuqarolar yigʻinida joylashgan ajabtovur shifo maskani haqida.

51-oilaviy poliklinikaning filiali sifatida faoliyat koʻrsatayotgan ushbu goʻshaga kirgan kishi oʻzini oʻtgan asrning 60 yillariga qaytgandek his etadi.

— Oilaviy poliklinika masalasi hududimiz uchun eng ogʻriqli masala, — deydi mahalla fuqarolar yigʻini raisi Shavkat Hakimov. — Koʻrib turganingizdek, poliklinika bundan chamasi 60 – 62 yil muqaddam qurilgan, ayni damga kelib oʻta taʼmirtalab ahvolga kelgan moslashtirilgan binoda joylashgan. Bu yerda bemorlar tugul shifokorlar uchun ham tuzukroq shart–sharoit yoʻq.

Darhaqiqat, bu yerni shifo maskani degani ham til bormaydi. Muolaja xonasi deb yozilgan xonaga kirib yoqa ushlaysan kishi. Hamshira Sanobar Ochilovaning bildirishicha, bemorlar, xususan, yosh bolali ayollar oddiy bir ukol olish uchun ham 5-6 kilometr yoʻl bosib “Solur” mahallasida joylashgan oilaviy poliklinikaga borishga majbur boʻlishyapti. Qishda bir xonada choʻyan pech oʻrnatib, oʻtin, koʻmir yoqib xonani isitishadi. Hamma shu xonaga kirib sovuqdan jon saqlaydi.

— Bir paytlar mahallamizda qishloq vrachlik punkti faoliyat koʻrsatardi, — deydi mahalla raisi. — Adashmasam, 2005-yilda faoliyati toʻxtatildi. Binosi buzildi. Biz shu joyni tishimizning kovagida asragandek asrab turibmiz .Koshkiydi, soha mutasaddilarining yuraklari “jiz” etsayu, shu yerda zamonaviy bir shifo maskani qurish tashabbusi bilan chiqishsa... Axir mahallamizda oz emas-koʻp emas, uch ming nafardan ziyod aholi yashaydi.

— Shu masalada yuqori tashkilotlarga bir necha bor murojaat qildik, — deydi yigʻin raisining oila, xotin-qizlar va ijtimoiy-maʼnaviy masalalar boʻyicha oʻrinbosari, xalq deputatlari tuman Kengashi deputati Nilufar Jumayeva. — Ammo hozirgacha joʻyali bir javob olganimiz yoʻq.

Suhbatdoshlarimizning taʼkidlashlaricha, hududda zamonaviy bir shifo maskani qurilishi qoʻshni mahallalarning Janapar, Qizilrabot qishloqlari aholisiga ham qulaylik tugʻdirgan boʻlur edi.

Aholiga sifatli, zamon talablariga mos tibbiy xizmat koʻrsatish mamlakatimizda eng ustuvor masalalar sirasida ekan, mutasaddilar shoʻrobodliklarning murojaatiga qachongacha panja orasidan qarashadi, hayronmiz.

Biz shu savolga Qorakoʻl tuman hokimligi, Buxoro viloyat sogʻliqni saqlash boshqarmasidan javob kutamiz.

Istam IBROHIMOV, “Xalq soʻzi”.