Foto: Islom Karimov qiyofadoshi

O‘zbekistonda xizmat ko‘rsatgan artist Ilhom Farmonovning o‘g‘li Islom Farmonov Instagram’dagi sahifasida tashqi ko‘rinishi O‘zbekistonning birinchi prezidentni Islom Karimovni eslatuvchi odam bilan tushgan suratini joyladi.

Islom Farmonov suratga “Sizlar ham o‘xshatdinglarmi?”, deb izoh qoldirgan.

Post izohiga ko‘plab foydalanuvchilar haqiqatan ham suratdagi inson Islom Karimovga o‘xshashini yozgan. Foydalanuvchilardan biri bu insonning ismi Alisher Rahimov va Birinchi Prezident kabi samarqandlik ekanini aytgan.

Ba’zi foydalanuvchilar hazil tariqasida ba’zi “takliflarini” yozib qoldirgan. “Tirik ekanlar-ku, qaytarib olib kelib qo‘yinglar, benzin narxini tushirib bersinlar”, — deydi izoh qoldiruvchilarning biri.

Eslatib o‘tamiz, Islom Karimov 1991-yildan umrining oxirigacha — 25 yil davomida O‘zbekiston prezidenti bo‘lgan. U 2016-yilning 2-sentabr kuni 78 yoshida vafot etgan, 3-sentabrda Samarqandning Hazrati Hizr masjididagi qadimiy qabristonga dafn etilgan. Karimov vafot etgan sana har yili birinchi prezident xotira kuni sifatida yod etiladi. Islom Karimov tavallud topgan sana — 30-yanvar esa har yili keng nishonlanadi.