Tadbirda ishtirok etayotgan Sanitariya-epidemiologik osoyishtalik va jamoat salomatligi xizmati boshlig'i Bahodir Yusupaliyev O'zbekistonda foydalanilayotgan vaktsinalarning narxi haqida maʻlumot berdi.

Bahodir Yusupaliyev bugungi kunda foydalanilayotgan vaktsinalar narxi hamda koronavirusdan davolanayotgan bemorlarga sarflanayotgan mablag'lar haqida maʻlumot berdi.

"Hozir Zangiotadagi maxsus shifoxonada davolanayotgan o'rta og'ir ahvoldagi bemorni davolash uchun davlat byudjyetidan 35 mln mablag' ishlatiladi. Reanimatsiyada davolanayotgan og'ir ahvoldagi bemor uchun esa 60 mln so'mgacha mablag' sarflanadi.

Bugungi kunda foydalanilayotgan vaktsinalar 10 dollardan 60 dollargacha narxlarda sotib olingani eʻtiborga olinsa, iqtisodiyot nuqtayi nazaridan qaralsa davlatga aholini emlash arzon va xavfsiz hisoblanadi. Taqqoslaydigan bo'lsak, emlanmaslikdan nafaqat o'zimizga, balki davlatga, xalqqa, iqtisodiyotga ham zarar yetkaziladi", dedi u.

Sanitariya-epidemiologik osoyishtalik va jamoat salomatligi xizmati boshlig'i maʻlum qilishicha, koronavirusga qarshi vaktsina virusli kasalliklarning barchasiga qarshi antitanachalar hosil qiladi.

"2020 yilning oxirida ijtimoiy soha vakillari: o'qituvchilar, tibbiyot xodimlarini grippga qarshi vaktsina bilan emlagan edik. 1 mln 200 ming vaktsina olindi. Kuzatuvlarimiz shuni isbotladiki, emlanganlar orasida koronavirusga chalinganlar kam bo'ldi va yuqtirganlarda ham kasallik yengil o'tdi. Bugungi koronavirusga qarshi ishlatilayotgan vaktsinalar virusga qarshi ishlaydi: uning oldini oladi va yengil o'tishini taʻminlaydi", dedi u.

Taʻkidlanishicha, agar inson organizmida antitanachalar mavjud bo'lsa ham vaqt o'tishi bilan antitanachalar miqdori pasayishi mumkin, shuning uchun emlanish maqsadga muvofiq bo'ladi. «Zamin» yangiliklarini «Vkontakti»da kuzatib boring