Navoiy viloyati Xatirchi tumanida qizi bilan jinsiy aloqa qilganlikda gumonlangan erkak sharmanda boʻlmaslik uchun tergovchiga pora taklif qilgani uchun sudlandi. Bu haqda Oliy sud matbuot xizmati xabar berdi.

Jinoyat tafsilotlariga koʻra, 62 yoshli A.Xamrayev (shaxsi oʻzgartirilgan) 2021-yil 10-mart kuni soat 12:00 larda Xatirchi tuman IIB huzuridagi Tergov boʻlimi surishtiruv guruhi surishtiruvchisi M.Rabbimovning ish yurituvidagi qizi Z.Akromovaning (shaxsi oʻzgartirilgan) u bilan jinsiy aloqada boʻlib kelganligi mazmunidagi ogʻzaki murojaati boʻyicha sharmanda boʻlmaslik maqsadida ishni ijobiy hal qilib berishi uchun M.Rabbimovga 1 million soʻm pora taklif qilgan.

Holat yuzasidan M.Rabbimovning bildirgisi asosida Navoiy viloyat IIB va Xatirchi tuman prokuraturasi xodimlari tomonidan 20-mart kuni oʻtkazilgan tezkor tadbirda A.Xamrayev Xatirchi tuman IIB maʼmuriy binosidagi M.Rabbimovning xizmat xonasida unga 800 ming soʻm berganida ashyoviy dalillar bilan ushlangan.

Sudda Xatirchi tuman prokurori tomonidan 27-aprel kuni aybga iqrorlik toʻgʻrisidagi kelishuvni tuzishda ayblanuvchining protsessual huquqlari tergov organi tomonidan taʼminlanib, aybga iqrorlik toʻgʻrisidagi kelishuv tuzish haqidagi iltimosnoma qanoatlantirilgan.

Sudlanuvchi A.Xamrayev sodir etgan jinoyatining xususiyati va ijtimoiy xavflilik darajasini, muqaddam sudlanmaganligini, uning aybiga toʻliq iqrorligini, qilmishidan chin koʻngildan pushaymonligini inobatga olib, Jinoyat kodeksi 211-moddasi (pora berish) 1-qismida nazarda tutilgan jinoyatni sodir etganlikda aybdor deb topilib, 2 yil muddatga ozodlikni cheklash jazosi tayinlangan.

Unga Jinoyat kodeksining 62-moddasi tartibida uzil-kesil 1 yil 9 oy 23 kun ozodlikni cheklash jazosi qoldirilgan.