Nafaqat IELTS, balki TOEFL, GMAT, GRE va SAT kabi xalqaro imtihon topshirish xarajatlari 2021-yilning 1-may kunidan boshlab toʻliq qoplab beriladi.

Xoʻsh, buning uchun qayerga murojaat qilish kerak?

Albatta, Davlat xizmatlari markazlariga murojaat qilinadi yoki Yagona interaktiv davlat xizmatlari portalida (my.gov.uz) roʻyxatdan oʻtib, xizmatdan foydalanish mumkin.

Soʻrovnomaga imtihon topshirish xarajati toʻlanganini tasdiqlovchi toʻlov kvitansiyasi hamda maxsus sertifikat (pdf formatda) ilova qilinadi.

Ariza beruvchidan ushbu bandda koʻrsatilmagan maʼlumot va hujjatlarni talab qilish qatʼiyan taqiqlanadi. Taqdim etilgan hujjatlardagi maʼlumotlarning haqqoniyligiga ariza beruvchi masʼul hisoblanadi.

Quyidagi shartlar toʻliq bajarilganda ariza beruvchiga kompensatsiya toʻlab beriladi:

- Imtihonda toʻplanishi lozim boʻlgan yuqori ballning (daraja) minimal koʻrsatkichi yoki undan yuqori natija qayd etganda. Misol uchun, IELTS sertifikati uchun 7 va undan yuqori ball toʻplanganda;

- Maxsus sertifikat berilgan sanadan boshlab 180 kalendar kun oʻtmasdan kompensatsiya toʻlashni soʻrab murojaat qilganda.

- Maxsus sertifikatda koʻrsatilgan imtihon natijasining haqiqiyligi va toʻgʻriligi Inspeksiya tomonidan tasdiqlanganda.

Qancha muddatda tasdiqlanganidan qatʼi nazar maxsus sertifikatning haqiqiyligi tasdiqlanganda maxsus sertifikat egasi boʻlgan ariza beruvchilarning elektron reyestrini shakllantiradi. Ushbu elektron reyestrga muvofiq kompensatsiya mablagʻlarini Oʻzbekiston Respublikasi aksiyadorlik tijorat “Xalq banki”ning hisobvaragʻiga moliyalashtiradi va xizmat natijasi boʻyicha ariza beruvchiga 15 kalendar kunda SMS xabarnoma yuboriladi.

Xorijiy tillarni oʻrganish ishtiyoqida yurgan yoshlar ushbu imkoniyatdan unumli foydalanadi, degan umiddamiz.

Fazliddin PARDABOYEV,
Davlat xizmatlari agentligi
Sirdaryo viloyat boshqarmasi masʼul xodimi.