O'zbekistonda bola puli va boshqa ijtimoiy nafaqa pullarini olish tartibi o'zgardi

AOKAda 8 aprel kuni bo'lib o'tgan brifingda Mahalla va oilani qo'llab-quvvatlash vazirligi axborot xizmati rahbari Saodat Boymirzayeva O'zbekistonda bola puli va boshqa ijtimoiy nafaqa pullarini olish tartibi o'zgargani haqida maʻlumot berdi. 

Taʻkidlanishicha, 5 mart kuni Vazirlar Mahkamasining «Aholini ijtimoiy himoya qilish tizimini yanada takomillashtirish hamda sohaga zamonaviy axborot-kommunikatsiya texnologiyalarini keng joriy etish chora-tadbirlari to'g'risida»gi qarori qabul qilingan.

Mazkur qarorga asosan, kam taʻminlangan oilalarni «Ijtimoiy himoya yagona reyestri» axborot tizimi orqali aniqlash hamda ularga ijtimoiy nafaqa va moddiy yordam tayinlash hamda to'lash tartibi to'g'risidagi nizom tasdiqlangan.

Unga ko'ra, 2021 yil 1 apreldan boshlab 14 yoshgacha bo'lgan bolalari bor oilalarga nafaqa, bola ikki yoshga to'lguniga qadar uni parvarish qilish nafaqasi, kam taʻminlangan oilalarga moddiy yordam hamda un va qolipli non xarid qilish bo'yicha qo'shimcha xarajatlarni qoplash uchun har oylik pulli kompensatsiya tayinlash va to'lash «Ijtimoiy himoya yagona reyestri» axborot tizimi orqali aniqlanadi.

«Bu toifa ijtimoiy yordam mablag'larini tayinlash va to'lash mahalla idoralarining xizmat vazifasidan chiqarilgan bo'lsa-da, ayrim fuqarolarimiz mahalla xodimlarining bu boradagi eʻtiborsizligidan shikoyat qilishmoqda», — dedi xodima.

Qaror asosida tasdiqlangan nizom talablariga ko'ra, bola puli va boshqa ijtimoiy nafaqa pullarini olish istagida bo'lgan fuqarolar o'zi yashab turgan fuqarolar yig'iniga murojaat qiladi. Shuningdek, pensiya jamg'armasining tuman (shahar) bo'limi boshlig'ining nomiga ariza yozadi. Ushbu ariza unga ilova tarzida belgilangan qo'shimcha hujjatlarni fuqarolar yig'iniga taqdim etadi.

Uning so'zlariga ko'ra, zarur hujjatlar fuqarolarning o'zini o'zi boshqarish organiga fuqaro ushbu nafaqa yoki moddiy yordam olishni istagan oydan oldingi oyning 16-sanasiga qadar taqdim etilishi kerak.

Belgilangan hujjatlar to'liq taqdim etilmagan holatda, fuqarolarning o'zini o'zi boshqarish organi xodimlari ariza beruvchiga qo'shimcha ravishda qanday hujjat kerakligini maʻlum qiladi. Fuqarolar yig'ini arizachi tomonidan taqdim etilgan maʻlumotlarning ishonchliligini belgilangan tartibda tasdiqlaydi hamda har besh kunda kamida bir marotaba, biroq ariza berilgan oyning 19-sanasiga qadar tuman (shahar) Pensiya jamg'armasiga taqdim etadi.

Shu bilan birga, kam taʻminlangan oilalarga ijtimoiy nafaqa va moddiy yordam pullarini tayinlash va to'lash borasida mahalla xodimlarining vakolati shu yerda tugaydi va keyingi jarayon tuman (shahar) Pensiya jamg'armasi tomonidan olib boriladi.

Maʻlumot o'rnida, ariza beruvchining murojaati rad etilsa, bu haqda arizachiga rad etish sabablari aniq ko'rsatilgan SMS-xabarlar yuboriladi.