Maʻlumki, ommaviy axborot vositalarida Davlat soliq qo'mitasi tomonidan qo'shilgan qiymat solig'i to'lovlarini noqonuniy ravishda kamaytirish maqsadida shubhali operatsiyalarni amalga oshirgan 396 ta tadbirkorlik subʻyekti bilan munosabatlarga kirishgan 8 ming 536 ta tadbirkor tomonidan qo'shilgan qiymat solig'i bo'yicha hisobga olingan 955 milliard so'm miqdorida soliq to'lovlariga o'zgartirishlar kiritilgani holati jamoatchilik orasida keng muhokamalarga sabab bo'lmoqda.

Yig'ilishda ushbu holat yuzasidan Davlat soliq qo'mitasining axboroti eshitildi.

Ushbu shubhali korxonalar "Bir kunlik firmalar" yoki "Naqdlashtiruvchi firmalar" ro'yxatining soliq xavfini aniqlash, tahlil qilish va baholash avtomatlashtirilgan dasturi asosida inson omilisiz shakllangan. Shuningdek, xo'jalik yurituvchi subʻyektlar lozim darajada ehtiyotkorlik chorasini ko'rish uchun kontragentini tekshirish va hujjatlarga ega bo'lish majburiyati 2020 yil 1 yanvarda amalda bo'lgan Soliq kodeksida belgilangan. Soliq kodeksining 14, 15 va 266-moddalari asosida hisobga olingan soliq summasiga tuzatish kiritilgan.

Reyestrga kiritilgan shubhali korxonalar bilan operatsiyalarni amalga oshirgan xo'jalik yurituvchi subʻyektlarning murojaatlariga tezkorlik bilan javob berish maqsadida Davlat soliq qo'mitasi va barcha hududiy davlat soliq boshqarmalarida maʻsul mutaxassislardan iborat ishchi guruhi tashkil etildi.

Bugungi kunda ishchi guruh aʻzolari tadbirkorlar bilan individiual tartibda suhbat olib borgan holda, masalalarga qonuniy yechim topmoqda.

Murojaat qilgan tadbirkorlik subʻyektlarining shubhali, deb topilgan korxonalar bilan bitimlari o'rganib chiqilmoqda, natijalari soliq qo'mitasining rasmiy saytida yoritib borilmoqda.

Davlat soliq qo'mitasi 2020 yilda pandemiya davrida soliq to'lovchilarni qo'llab-quvvatlash maqsadida chorakda bir marotaba soliq hisobotini taqdim etish huquqi berilishi ham shubhali korxonalarning vaqtida aniqlanmaganligiga sabab bo'lganini bildirdi.

Yig'ilishda deputatlar xorij tajribasidan kelib chiqib bir kunlik(obnal) firmalar muassislari va masʻul xodimlarining soliq hisobotlari bo'ycha masʻuliyatini oshirish, QQS bo'yicha alohida hisobraqami ochish takliflarini o'rganib chiqib qonunchilikka tegishli o'zgartirishlar kiritish masalalarini o'rtaga tashladi.

Shuningdek, kelgusida tadbirkorlarga yanada qulaylik yaratish maqsadida shubhali korxonalar reyestrini rasmiy veb-saytlarga tezkor joylashtirib borish choralarini ko'rish bo'yicha tavsiyalar berildi. Xo'jalik yurituvchi subʻyektlar lozim darajada ehtiyotkorlik chorasini ko'rish uchun kontragentini tekshirish va hujjatlarga ega bo'lish majburiyati va boshqa soliq islohotlari yuzasidan tushuntirish ishlarini jadallashtirish – kelgusida halol tadbirkorlarning ko'payishida muhim ahamiyat kasb etishi taʻkidlab o'tildi.