Bu haqda AOKAda Davlat soliq qoʻmitasi boshqarma boshligʻi Shodiyor Ahmedov ishtirokida oʻtkazilgan brifingda maʼlum qilindi.

2021-yildan boshlab, jismoniy shaxslarning koʻp qavatli uylarga uzviy bogʻliq boʻlgan avtomashina turar joylari mol-mulk soligʻi obyektlari qatoriga kiritildi.

Kadastr organi avtomashina turar joylarining kadastr qiymatini belgilaydi.

«Avtomashina turar joylari uchun xuddi jismoniy shaxs turar uy-joyi uchun toʻlanadigan mol-mulk soligʻi stavkasida, yaʼni kadastr qiymatidan 0,23 foiz stavkada toʻlanadi.

Masalan, avtomashina turar joyining kadastr qiymati 11 mln soʻm. Avtomashina turar joyining yillik mol-mulk soligʻi miqdori — 11 mln soʻm x 0,23% = 25 300 soʻmni tashkil qiladi.

Oldingi yillarda jismoniy shaxslar ushbu noturar joylar uchun yuridik shaxslar uchun nazarda tutilgan stavkada (2%) mol-mulk soligʻini toʻlar edi. Yaʼni, 11 mln dan 2% = 220 ming soʻm (9 baravar koʻp)", dedi Shodiyor Ahmedov.