TikTokda bolalarni o'z joniga qasd qilishga undagan bloger fosh etildi

post Foto: «W-n.com.ua»
Italiyaning Florentsiya prokuraturasi TikTokdagi sahifasi orqali o'z joniga qasd qilishga undaydigan maʻlumotlarni tarqatayotgan blogerni topdi. Bu haqda RIA Novosti pochta politsiyasi vakiliga tayanib xabar berdi.

Xavfli videolarni joylagan bloger Sitsiliyaning Sirakuza viloyatida yashovchi 48 yoshli ayol bo'lib chiqdi. Prokuratura uning ijtimoiy tarmoqlarga kirishini bloklashga qaror qilgan.

Bloger joylagan videoda erkak bilan ayol kim ko'proq nafas olmasdan turishga bahslashadi. Politsiya ushbu videoni xavfli deb topib, italiyalik ayolni o'z joniga qasd qilishga undashda aybladi. Tergov jarayonida ayol xavfli musobaqalardan iborat boshqa videolarni ham joylashtirgani aniqlandi. Uning sahifasiga 730 mingdan ortiq kishi obuna bo'lgan.

Avvalroq, Italiyada 10 yoshli qizcha TikTokning blekaut deb nomlangan chellenjida qatnashib, vafot etgani haqida xabarlar tarqalgandi. Shu munosabat bilan hukumat ijtimoiy tarmoqdagi yoshini hujjat asosida aniqlab bo'lmaydigan barcha foydalanuvchilarning akkauntlarini bloklab qo'ydi.

TikTokdagilar esa qizni ushbu chellenjda ishtirok etishga undaydigan hyech qanday maʻlumot topilmaganini taʻkidlamoqda. Shunday bo'lsa-da, ijtimoiy tarmoq o'z joniga qasd qilishga undovchi maʻlumotlarni tekshirishda hukumatga yordam berishga tayyorligini bildirdi.